نێچیروان بارزانی باوەت کامپ هۆل وەرد وەرپرسەیگ ئەمریکی واز کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، وەگەرد نیکۆلاس گرینجەر وەرپرس شاند ئەمریکی ئەرا کاروبار باکوور خوەرهەڵات سوریا و شاند یاوەری گردەو بوی.
لەو دیادرە ک قونسوڵ گشتی ئەمریکا لە هەرێم کوردستان ئامادەی بوی، باس نووترین گەشەیل لە سوريا و عراق و هەڕەشەیل داعش، پەیوەندیەیل ناوبەین لایەنەیل کورد پیکاتەیل لە سوریا، و رەوشەیل کەمپەیل کریا، وەتایبەت کامپ هۆل.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەنەگە دووپات لەبان وەردەوامی هاوکاری هاوبەش ئەرا نواگردن تیرۆر و مەترسی داعش کردن ک هیمان رخیگ راسیە هەڕەشەی سوریا و عراق و ناوچەگە دەێد، و هەردوگ لایەنەگە هاوڕا بوین لە گرنگی هاوکاریکردن دەوڵەتەیل ئەوروپا و ناوچەگە ئەرا گلەوداین هاووڵاتییەیلیان لە کامپ هۆل لە سوريا ئەرا وڵاتەیلیان.
لەی باوەتە، نێچیروان بارزانی سەرۆک هەرێم کوردستان دووارە دووپات لەبان ئەوە ک لە لەناوبردن تیرۆر تەنیا وە هاز چەک نیەکریەێد، باوجی لەناوبردن تیرۆر بایەتە وە پەروەردە و قویلکردن کەلتور وەخشین و ئەوەکە قبووڵکردن و وەیەکەوژیان، ونواگردن هویر تونەڕەوی باێد.
خوازین گفتوگۆ ویەکڕزی لایەنەیل کورد و ئەو پیکاتەیل سوریا، رەوشەیل ناوچەگە وەشیوەی گشتی، و باوەتەیلیگتر ک لەلای هەردوگ لایەنەگە گرنگن، باسەیل ناو ئەو دیدارە بوین.
وەرجەیە، قاسم ئەعرەجی راوێژکار ئاسایش نەتەوەیی عراق، لە رێککەفتنیگ ناودەوڵەتی ئەرا چەکانن کامپ هۆل سوریا راگەیان، وەبی باسکردن هویردەکاریەیل ئەو دەوڵەتەیلە ک لەبان رێککەفتنەگە واژوو کردنە، یا خشتەیگ ئەرا ماوەی جیوەجیکردنی، و دووپات کرد ک ئیسە زیاتر لە ٦٠ هەزار کەس هانە ناو کامپەگە، فرەیان عراقی وسوریین، وەگەرد رەگەزنامەی ٥٠ دەوڵەت.
