ئەمریکا: بازرگانی وەرد هەرێم کوردستان وەردەوامە لە فراوانبوین وەتایبەت لە چین وزە

شەفەق نيوز/ ستیڤ پیتنەر قونسوڵ ئەمریکا لە هەولێر، ئمڕوو یەکشەممە، وت: بازرگانی ناوەین ئەمریکا و هەرێم کوردستان وەردەوامە لە فراوانبوین، وەتایبەت لە چین وزە.

  قونسوڵ ئەمریکا لە وتاریگ لەناو ئاهەنگ واژووکردن گریەبەسی ناوەین کۆمپانیای "تورۆس" و کۆمپانیای "ژەنیڕاڵ ئەلیکتریک" لە سلێمانی وت: 90% لە کارەبای هەرێم کوردستان ئیرنگە وە تۆربینەیل کۆمپانیای ژەنیڕاڵ ئەلیکتریک کار کەن.

پیتنەر دووپاتیش کرد کە کارەبا چشتیگ سەرەکیە لە گەشەپیدان هەر ئابوورییگ، وتیش؛ ناوەین هەرێم کوردستان و ئەمریکا پەیوەنی دویرودرویژیگ هەس، و کارەگەی ئمڕوو بەڵکەس ئەرا ئی هاوکاریە.

 وتیش: ئەو گامە کە ئمڕوو نریا، دەسمیەتی دەێد لە فراوانکردن کەرت وزەی هەرێم کوردستان.

قونسوڵ ئەمریکا وتیش؛ کۆمپانیایل ئەمریکی مینەی دەرفەت بەرهەمهاوردن لە هەرێم کوردستان کەن، و خوازیمن هاوبەشیمان فراوانەو بکەیمن.