"ماستی قەڵاتی"... رووژ وەخشین کاکەیی لە هەڵەبجە، نشان بەهایایل دووسی و تەبایی کۆمەڵایەتی دەێد (وینە)

شەفەق نیوز/ لە ئاوایەیل هاوار و هاوار کویەن، و دەرتویای سەر وە پارێزگای هەڵەبجە لە هەرێم کوردستان و وە درویژایی وهار گشت ساڵیگ پەیڕەوەیل ئایینیکاکەیی بوونەی "ماستی قەڵاتی"، یا ئەوەگ وە رووژ وەخشین کاکەیی ناسریاس، ئاهەنگ کەن.

ڕی نەریتە کە ڕەگ و ڕیشە لە میژوو ناوخۆیی دیرێد، لەوە زیاترە کە ڕێوڕەسمیگ ئایینی بوود، تا بوودە بوونەیگ کۆمەڵایەتی کە ڕەنگدانەوەی بەرزترین بەهایل وەخشین و برایەتی لە ناوەین ئەندامەیل کۆمەڵگا بوود.

ڕەگ و ڕیشەی میژوویی و رووحیگ نووەوبوی 

دەشتی ئەحمەد ئەرا پەیامنێر ئاژانس شەفەق نیوز وت: "رەگ و ڕیشەی ڕی نەریتە گلون خوەێد ئەرا بۆ سەردەم کویەن". وتیش: "جاران خەڵک بەرهەمە ئاژەڵییەیل وە تایبەت شیرەمەنی پیشکەش وە کەسەیل نەدار و سەردانکەران شوینە پیرووزەیل گوندی هاوار کردیان، وەگەرد رووزگارەو ئی رووزە سیمایگ ئایینی و کۆمەڵایەتیی جیاوازیگ وەدەس هاورد، کە لە رییەو کاکەییەیل ئاهەنگ کەن بۆ واتەیل دووسی و گەردنازایی، و وەگەرد گشت سەختییگ یەکڕزی کۆمەڵگە دووپات کەن".

کەشیگ رووحی

لە کۆتایی مانگ نیسان ئامادەکارییەیل  دەسوەپی کەن، خیزانەیل بەرهەمە شیرەمەنیەیل گردەو کەن و پیشکەشی وە کەسەیل نەدار کەن و هامشوو یەکتری کەن، یەیش جویر نمایشیگ میوانداری بەخشندە. هەرلیوا نمایش مۆسیقای ئایینی وەڕیەو چوود، کە تەمویرەی ناودیار کاکەیی نمایش کریەێد، کە ئامێریگ تارییە و واتەی رووحی قویلیگ لە بوونە ئاینییەیل کاکەیی دیرێد.

عاسی ساڵح فایق، یەکیگ لە ڕێکخەرەیل چالاکییەگە ئەرا ئاژانس شەفەق نیوز وت: "رووژ وەخشین بوونەیگە ئەرا دووپاتکردن یەکڕزیمان". وتیش: "خوازیمن ئەوە نشان جیهان بەیمن کە وەخشین و دووسی تەنیا دروشم نیین ئەرا ئیمە، بەڵکم شێوازیگ ژیانە کە ڕەگ و ڕیشەی لە هویروڕامان هەس، ئیمە نووڕیمن کۆمەڵگەیگ کە وەخشین لەتی بوود وەبی ئەوەگ چەوەڕی هەیچ چشتیگ وەرانەوری بکەێد، مەردمیگە توانای نواگیریکردن گشت سەختییگ دیرن".

وەیەکەوژیان و ئاشتی کۆمەڵایەتی

ڕوستەم کاکەیی، کە بەشداری چالاکییەگە کرد، ئەرا پەیامنێرمان وت: "ئی رووژە پەیام کلکریەێد کە سنوور کۆمەڵگەی کاکەیی رەد کەێد، ماستی قەڵات تەنیا ئەرا کاکەیی نییە، بەڵکم پەیامیگ وازە ئەرا گشتی کە وەیەکەوژیان و ئاشتی وە هویردەکاری بویچگ جویر وەخشین و هاوبەشی دەسوەپی کەێد، ئیمە فێر ماڵەیلمان کەیمن کە دووسی و گەردنازایی هویچ سنووریگ نەرێد".

وتیش: ڕێوڕەسمەیل وە شیوەیگ ئاسایی وە سەردان مەزارگەی هاوار دەسوەپی کەێد، کە کاکەییەیل لەورا گردەو بوون ئەرا خوەنستن  نماز و بانگەواز تایبەت، ئیجا وەردەوام بویمن لە دابەشکردن بەرهەمە خوەراکیەیل ئەرا گشت ئەوانەگ خوازنەی وەبی جیاوازی.

رۆڵ ژنەیل کاکەیی 

ژنەیل کاکاەیی لەی رووژە ڕۆڵیگ سەرەکی دیرن، شوکریە هەواری چالاکوان کۆمەڵایەتی ئەرا ئاژانس شەفەق نیوز وت: "جویر ژن خواردن ئامادە کەیمن و شیر گردەو کەیمن و بەشیەو کەیمن". "بەشداری ژن لێرە تەنیا دەسمیەتی نییە، بەڵکم پایەیگ بنەڕەتی ئی نەریتە. ئێمە مناڵەیلمان هووکارە کەیمن چوین وەخشین بەشیگە لە بویینیان".

سەختیەیل و ئومید

لەبان ئەو رەوش ئابووری سەختە کە کەفێدە نوای فرویگ لە ناوچەیل کوردستان، کاکەییەیل رکدار بوین لەبان وەردەوامبوین لە ئاهەنگگێڕان وەو بوونە. هێمن دارتۆیی گەنج، یەکیگ لە بەشداربویەیل ئویشێد: "هەرچەن رەوش ئیمە سەختە، بەڵام وەخشین هەرگیز نیەوسێد". "ئی رووژە ئەوە خەێدە هویرمان کە بەختەوەری لە وەرگردن نییە، بەڵکم لە وەخشینە."

پەیامیگ کە گشت ساڵیگ نووەو بوود.

هێمن دووپات  لەوە کەێد کە رووژ ماستی قەڵات بویەسە زیاتر لە تەنیا نەریتیگ ئایینی؛ بویەسە هێمای خوەیڕاگری ناسنامەی کاکەیی، و بوونەیگ تا کۆمەڵگا پابەندبوین خوەی وە دووسی و وەخشندەیی و بەهایەیل وەیەکەوژیان ئاشتیانە نووەو بکەێد، لە وەختیگ ئی جویرە پەیامە مرۆییانەی فرە خوانێدەی.