لە رووژ رووژنامەوانی کورد نێچیروان بارزانی دووپات لە گرنگی "مقیەتیکردن ئازادی قسەکردن" کەێد
شەفەق نیوز/ نێچیروان بارزانی، سەرۆک هەرێم کوردستان ئمڕوو سێشەممە، پابەندبوین خوەی بە دابینکردن ژینگەیگ گونجیاگ ئەرا کار رووژنامەوانی لە هەرێم دووپاتکرد، داوا لە رووژنامەنویسەیل کرد پابەندبوون وە پیشەیی و بیلایەنی و متمانەپیکریایی لە ئەنجامدان کارەیلیان.
یەیش لە بەیاننامەیگ هات کە وە بوونەی 127 هەمین ساڵیاد چاپکردن رووژنامەی کوردستان لە لایەن شازادە موقداد میدحەت بەدرخان، و 27 ساڵەی دامەزرانن سندیکاتی رووژنامەنویسەیل کوردستان.
نێچیرڤان بارزانی سەرۆک هەرێم کوردستان وت: "وە گەرمی و لە دڵەو پیرووزبایی لە گشت رووژنامەنویسەیل و پیشەگەرەیل میدیایی کوردستان کەم، وە ئومید پیشکەفتن زیاتر و سەرکەفتن وەردەوامیان".
بارزانی دووپات لە پابەندبوین خوەی وە "ئازادی رووژنامەگەری و قسەکردن و گرنگی و مقیەتیکردن ئازادی قسەکردن جویر یەکیگ لە بناغە بنەڕەتییەیل دیموکراسی و پیشکەفتن و کۆمەڵگەیگ تەندروس و بیوەی" کرد.
سەرۆک هەرێم کوردستان دووپاتیش کرد کە "وەردەوام بویمن لە کارکردن ئەرا دابینکردن کەشیگ گونجیاگ ئەرا کار رووژنامەوانی کە گەرەنتی دەسڕەسین وە زانیاری بکەێد و دویر بوود لە گشت پاوەن و وەربەسیگ و ئاستەنگییگ، و کارکەیمن ئەرا چارەسەرکردن هەر پێشێلکارییگ لە چوارچیوەی یاسای رووژنامەوانی".
بارزانی وتیش: باوەڕ دیریمن رووژنامەگەرییگ ئازاد و ویرەدار و وەرپرسیار و ڕەخنەگر هاوبەشیگ سەرەکییە لە بیناکردن کوردستانیگ دادپەروەرتر و پیشکەفتنخوازانەتر، ئەراوە لەی بوونە گاڵ رووژنامەنویسەیل دەیمن، کە جویر هەمیشە کردیمنە، پابەندبوون وە پیشەیی و بیلایەنی و متمانەپیکریایی، خوەیان لە زیایچگن و قسەی گەزاف دویر بخەن، بەرژەوەنییەیل وڵات و ئاشتی کۆمەڵایەتی لە بان گشت چشتیگ بنەن و ڕۆڵ کاریگەرییان لە چەسپانن کولتوری فرەیی، وەیەکەوژیان، قبوڵکردن ئەوەکان و وەخشین بڕانن."
نێچیروان بارزانی سەرۆک هەرێمی کوردستان لە قسەیلی وتیش: "لەی رووژە وە پیزانینەو یاد شەهیدەیل رووژنامەگەری کوردی و گشت ئەو کەسەیلە کەیمن کە قوربانی دانە ئەرا رەسانن راسی و خزمەتکردن کۆمەڵگە، ئیمە ڕۆڵ ریخریاگەیل ناوخۆیی و ناودەوڵەتی لە چەودیاریکردن ئازادیی قسەکردن لە کوردستان وە نرخیگ فرە زانیمن، و دڵنیایان کەیمن کە سوودمەن بویمن لە ڕاپۆرتەیلیان لە پەرەپیدان ژینگەی ڕاگەیانن و ڕووژنامەوانی لە وڵاتەگەمان".
