لە 2017ەو گیریانە.. پەکەکە دوو ئەفسەر هەواڵگری دەێدە دەس تورکیا
شەفەق نيوز- ئەنقەرە
جەنگاوەرەیل پەکەکە، لەی دویاییە، دوو ئەفسەر هەواڵگری دانە دەس دەسەڵاتەیل تورکیا، کە لە ساڵ 2017ەو لەلای حزبەگە دەسوەسەر کریاوێن، لە گامیگ جویر هەڵمەت دروسکردن دڵنیایی باسی کریا، کە وەگورەی راپۆرتیگ لەلایەن "ئەلمونيتور"، ئمڕوو دووشەممە.
وەگورەی سایت خەوەری ئەمریکی، ئەو دوو ئەفسەرە، ئایدن غونێل و ئیرهان بيكجيتين، لە ناوچەی دوکان لە پارێزگای سلێمانی لە هەرێم کوردستان رفیانە، و گومان لەبانیان بوی کە سەرپەرشتی تووڕیگ سیخوڕی کردیان ئەرا پەلاماردان سەرکردەیل حزبەگە، لەلییان جەمیل بایک، کە یەکیگە لە دیارترین سەرکردەیلی.
وەگورەی دووپاتکردن سەرچەوەیلیگ کورد ئەرا سایتەگە، ئایدن غونێل یەکیگ لەو دوو ئەفسەرە لەوەر بیماری لە دەسوەسەری مردگە، و تەرمەگەی دریا دەس لایەن تورکی، و ئەوەکەیش ئەرا ئەنقەرە کلەو کریا.
ئی کارە لەسای تەقەلای رەجەب تەییب ئەردۆگان سەرۆک تورکیا تیەێد ئەرا زەمینەسازی یەکلاییکردن وەرد عەبدوڵڵا ئۆجەلان ریبەر کورد کە زیندانی کریاس، لە تەقەلای رازیکردن پارت گەلەیل دیموکراتی، وە پشتگیری تەقەلایلی ئەرا درویژەوکردن ماوەی سەرۆکایەتیی دویای 2028، هەرچەن خاڵەیلیگ دەستووری هەن ریگری لە کاندیدکردنی ئەرا سەرۆکایەتی سێیەمی کەن.
وەلێ چەودیاریکەرەیلیگ جویر کۆمپانیای سڵاکاری سیاسی "تينيو" لە لەندەن، هوشداری دان کە شایەت ئامانجەیل ئی کارە یەکلاییکردن تەواوەتییگ نەوود، وەگەردی خەڵەتانن سیاسی بوود ئەرا بەرزکردن دەسەڵاتید پەرلەمانیی و لاوازکردن رکابەرەیلی، وەتایبەت پارت گەل کۆماری.
هەرلیوا، دەسەیگ پەرلەمانی لە 51 پەرلەمانتار، کە نوێنەرەیل پارت دادپەروەری و یەکسانیی و هاوپەیمانەیل نەتەوەیی وەگەرد ئۆپۆزسیۆن ئامادەکاری کەن ئەرا ئەنجامدان یەکەمین گردەوبوین لەی هەفتە ئەرا کیشان نەخشەی رییگ ئەرا ئەوەک حکومەت تورکیا وەپی ئویشێد (تورکیای بی تیرۆر).
ئۆپۆزسیۆن داوا کەێد دەسەگە بکەفێدە فتراق چاکسازیەیل دیموکراتی و مەرەقەزکردن دەسگیرکریاگەیل سیاسی جویر سەڵاحەدین دەمیرتاش و ئەکرەم ئیمام ئۆغڵو، لە وەختیگ مەزەنە کریەێد باس چارەنویس هەزاران لە جەنگاوەرەیل کورد بکەن کە هانە کویەیل هەرێم کوردستان، وەگەرد ئەگەر پیشکەشکردن وەخشین گشتی ئەراک بەشیگیان، یا کلکردیان ئەرا دەوڵەتیگ ترەک.
سەرکەفتن ئی تەقەلایلە هەمیش وەمەرج چارەنویس دانوسەنین ناوەین هیزەیل هەسەدە گریە دریاس، لەسای پەڵپەیل ئەنقەرە و دیمەشق وە هەڵوەشیان ناووک ئەو هیزەیلە کە پەیوەندی وە پەکەکە دیرن، و تیکەڵبوین چەکدارەیل کورد لەناو سوپای سوریا.
