فەیلیەیل لە واست.. زورباتیە باوەش کەێدە مەردم ناو ئاهەنگ نەوروز
شەفەق نیوز/ سەدان لە کوردەیل فەیلی و هاووڵاتیەیل لە جۊراجور نەتەوەیل عراق ئاهەنگ وە جەژن نەوروز کردن، و شار زورباتیەی سنوری لە پارێزگای واست کردنە شۊنیگ وەرەوپی رۊ کەن، لەوەر سروشت و ژینگەی گەشتوگوزاری ناوی.
وینەیلیگ رەسینە ئاژانس شەفەق نیوز، نشان بڕیگ لە مەکتەوەیل دان، ک کاروانەیل مەکتەوی وەرەو ناحیەی زورباتیە رێک خستن، ئەرا ئاهەنگەیل جەژن نەوروز،
و هەمیش بەشیگ لە چالاکیەیل هونەری لەناویان بۊ، وەگەرد سەدان لەو هاووڵاتیەیلە ک هەرکە وە شیوەی خوەی ئاهەنگ کرد. دەیان کەس لەو مەردم ناو ئاهەنگ نەوروز، چگنە گژ زنجیرەی کۊیەیل حەمرین، و کەسەیلیگتر لەناو دووڵ و هاماریەیلە گەردین.
لەلای خوەییش، محمد جەمیل مەیاحی پارێزگاز واست، لە بەیاننامیگ رەسیە ئاژانس شەفەق نیوز وت: چالاکیەیل رەنگاوڕەنگیگ لە زورباتیەی کۊیە و رەنگینی، ئی رووژە وەبوونەی جەژن نەوروز و هاتن وەرز وەهار ئەنجام دریان.
و دیاری کرد ک پارێزگاگە کەشوهەوای ئاسایش و خزمەتگوزاری ئەرا خەڵک واست و ئەو پارێزگایل دابین کرد.
وتیش" پارێزگاگە چەن کاریگ گەشەکردن خزمەتگوزاری لەناوچەگە جۊر قۆناغ یەکەم ئەنجام دا، و ئەوەسا لەماوەی ئایندە کارەگە تەواو کریەێد، لەناو پلان گەشەپیدان ئی شۊن گەشتوگوزاری جیاوزە، تا بوودە شۊنیگ ئەرا هاتن گەشتیارەیل.
مەیاحی باس لە ئومید خودی کرد ک حکومەت فیدراڵی وەگەردمان لە پاکەوکردن ناوەچە گەشتوگوزاریەگە بووسیەێد لە مین و جیماگەیل جەنگ، و راگەیانن ناوچەگە جۊر دەرفەتیگ بەرهەمهاوردن گەورەیگە.
