سلێمانی.. خەڵک ئاواییگ ناڕەزایی کەن لەبان ئەوە کە زەویەیل کشتوکاڵییان کردنەسە نیشتەجییوین.. وینە

شەفەق نيوز/ خەڵک ئاوای قایکەن سەروە پارێزگای سلێمانی، وسیانیگ ناڕەزایی لە وەردەم بینای پارێزگاگە رێکخستن، لەبان بڕیار شارەوانی کە زەویەیل کشتوکاڵییان کەێدە زەوی نیشتەجییوین و ئەرا فەرمانبەرەیل دەوڵەت بەشیانەو کەێد.

 دلێر فارس موختار ئاوایەگە لە کۆنگرەیگ رووژنامەوانی وە ئامادەبوین ئاژانس شەفەق نیوز وت: ئاوایەگەی ئیمە زیاتر 35 کیلۆمەتر لە سەنتر شارەوانی سلێمانیەو دویرە، و نەکەفتیەسە ناو سنوور ئیداریی، وتیش؛ سەرسام بویمن وە دەرچگن بڕیاریگ لە 27 ئازار 2025 کە ئی زەویەیلە کەێدە زەوی نیشتەجییوین ئەرا بەشەوکردنیان وەبان فەرمانبەرەیل، وەتایبەتی فەرمانبەرەیل حکومەت.

فارس وتیش: رووبەر ئی زەویەیلە رەسێدە 1450 دۆنم، و سەرچەوەی رزق سەرەکیە ئەرا زیاتر لە 100 کشاوەرز و خیزان، و هن 68 کشاوەرزە، و دەسمیەتی دەن لە دابینکردن بەرهەمەیل کشتوکاڵی ئاوایەگە و ئاوایەیل شانی.

وتیش: بڕیار ئاڵشتکردن زەوییەیل ئەرا نیشتەجیبوین بڕیاریگ ستەمە زەرەد وە خەڵک ئاوایەگە رەسنێد، و هیلێد کووچبردن لە ئاوای وەرەو شار زیایەو بوود لەوەر نەمان دەرفەتەیل کار، کە فرەی خیزانەیل پشت وە کشتوکاڵی و لەبان ئی زەویەیلە بەسن.

دلێر فارس دووپاتیش کرد کە وەمدوو ئی کارە هاتیمنە ئەرا بینای پارێزگای سلێمانی و داواکردن لە شارەوانی سلێمانی ئەو بڕیارە پویچەڵ بکەێد و ریکارەیلی بووسنێد.