سەرۆک هەرێم کوردستان پەیامیگ تایبەت ئەرا مەسیحیەگان وەبۆنی جەژنەیل زایینی ئاڕاستە کەێد
شەفەق نیوز/ نێچیرڤان بارزانی سەرۆک هەرێم کوردستان، پەنجشەممە، پێروزبایی لە زاین مەسیح ئاڕاستە کرد.
لە بەیاننامەیگ وت: وەداخەو ک هەرێم کوردستان جوور گشت جهانەگە، لەوەر بڵاوبوین پەتای کۆڤید-١٩، رسوومەیل گەورایگ ئەرا ئاهەنگ جەژنەگە وەخوەی نێوونێد، بەڵکم بیگومان ک دڵ گشتی پێشوازی و پێروزبایی لە ساڵیاد پەیابوین مەسیح کەێد، و ئومید خوازم جەژنەیل و بۆنەیل هاتگ لە سای رەوشەیلیگ خاستر بانەو.
وتیش؛ لەی ساڵیاد پیرووزە جەخت کەیمن ک هەرێم کوردستان هەر جوور جارانی مینێد جوور ماوایگ ئەرا یەکگردن و فراوانی و پێکەوەژیان لەناونی پێکهاتەگانی، و هەر مینێد جوور ماڵ گەرمیگ و خاکیگ ئەرا خوەشک و برا مەسیحیەگان.
گشتمان وەیەکەو رووژەیل سەخت و قەیرانەرەیلیگ و و گرفتەیل فەریک رەد کردیمن وەخاسی یەکگردنمان و قوربانیەیلمان، و وەخود شیوەگە ئەوەسا لەی رەوش سەختە و پەتا و قەیرانەیلە رەد کەێمن، و دوویارووژ رووشنیگ چەوەڕیمان کەێد.
وتیش؛ دڵنیای هاووڵاتیەلمان کەیمن، ک ئیمە گشت تەقەلایلمان و توانایلمان ئەرا دووارە ئاوەدانکردن ناوچە زەرەدمەنەگان لە جەنگ دژوە تیرۆر کەیمن ئەرا سڕانن ئاسەوارەیل جەنگەکان، تا ئاوارەگانیان بتوێەنن وەرەو پیان بچنەو وەگەرد ئارامی و گەشەکردن، و دووارە ناچار ئاوارەیی نەوون، و گشت مافەیلیان دابین بکریەێد.
