ئێزدیەیل پیشوازی لە (سەر ساڵ) کەن.. وینە
شەفەق نيوز/ ئێزدیەیل لە عراق و جیهان، ئمڕوو چوارشەممە، ئاهەنگ وە سەر ساڵ ئێزدی کردن، کە کەفێدە یەکەمین چوارشەممە لە مانگ نیسان لە گشت ساڵیگ، وەگورەی رووژنامەی ئێزدی.
هەر لە شەوەکی زویەور خەڵک شار و ئاوایەیل هامشوو و سەردان یەکتری کردن، ئەرا پیرووزباییکردن.
لەی رووژە، خیزانەیل ئێزدی ئامادە ئەرا ئاهەنگ جەژن کەن، کە پڕتاڵ نوو سینن و خوەراک تایبەت وەی بوونە دروس کەن، وەگەرد سەنین شیرینی و کەرەستەیل گرنگ.
لەی باوەتە، باسمە قاسم، خەڵک قەزای شێخان خوەرهەڵات پارێزگای دهۆک، ئەرا ئاژانس شەفەق نیوز باس خوەشیی کرد، کە وت: ئمڕوو رووژ جەژنە، و ئیمە خوەشاڵیمن، وەرجە ماوەیگ ئامادەکاری ئەرا ئی رووژە کردیمنە، و لە سەوەکیەو چگیمنە پیریی میوانەیلەو و شیرینی وەپییان پیشکەش کردیمن، و بڕ فرەیگ لە زاڕووەیل هاتنە ئەرا ماڵ ئیمە تا ئاهەنگ بکەن، خوەراک خوەمانی جویر کوبەی تورش دروس کردیمن، کە گشت ماڵەیل دروسی کەن.
وتیش: سەردان قەورەیل کەسوکارەیلمان کردیمنە، و لەناو قەورسان خێر بەشەو کردیمن.
لەلای خەوەییشر خالدە جەلال ئەرا ئاژانس شەفەق نیوز وت: ئیمە ئیوارەی جەژن دەرچیمنە ناو سروشت، و لەورا گوڵە سوورەی وەهار چنیمنەو، و کەیمنەی دارەو لەقەی دەرەیل ماڵەیلمان، وەگەرد تووک خا، و رەنگاوڕەنگ خا کەیمن، و رەنگەیل رووشنیگ جویر ڕەنگینی سروشت.
