"رووژ شەهید فەیلی".. سودانی گامەیل نوویگ ئەرا پشتگیریکردن کوردەیل فەیلی راگەینێد
شەفەق نيوز/ محمد شیاع سودانی سەرۆک وەزیرەیل عراق، ئمڕوو چوارشەممە، پیشوازی لە بڕیگ لە خاوەن شەهیدەیل لە کوردەیل فەیلی کرد، ئەوەیش وە بوونەی رووژ "شەهید فەیلی عراقی" کە کەفێدە 2 نيسان لە هەر ساڵیگ.
وەگورەی بەیاننامەیگ لە نویسنگەی سودانی کە رەسیە ئاژانس شەفەق نیوز، سودانی لە وتارەگەی دووپات کرد کە ئی رووژە بوونەیگە ئەرا یادکردن ئەو ساڵیاد زیاندارە ئەرا قیزەونترین تاوانەیل رژیم دیکتاتۆر وە کوردەیل فەیلی، کە یەکیگە لە بەدترین وەرزەیل لە میژوو رژیم لەناودریای، و دووپات کرد کە ئی تاوانەیلە لەبان لایەنگری و ناسنامەی ئاینی ئی پیکاتەی رەسنە لە عراق هات.
سەرۆک وەزیرەیل دووارە باس هەڵمەتەیل بارکردن زوورکاری و سەرنقومکردن گەنجەیل کورد فەیلی کرد، کە لەناو بڕە قەورسانەیل زنیوەچاڵ کریان، دویای ئەوە کە رژیم وەرین لە تاقیکردن چەک بەکتریا وەکاریان هاورد.
سودانی دووپاتیش کرد کە کوردەیل فەیلی قوربانیەیل گەورەیگ لە بیناکردن دەوڵەت نوو عراق پیشکەش کردن.
هەرلیوا، سودانی دووپات کرد لە وەردەوامی تەقەلایل حکومەت ئەرا سزادان ئەوانەج دەسیان لەناو ئەو تاوانەیلە بویە، لەناویان سزادان سەر رژیم سەدام حسێن، و دەسگیرکردن بڕیگ لە ئەندامەیل دەزگای ئەمن عام بەدناو وەی دویاییە.
هەمیش باس بڕیگ لەو ریکارەیلە کرد کە ئەرا رێزگردن لە کوردەیل فەیلی جیوەجی کریان، لەلییان دیاریکردن رووژ 2 نیسان تا بوودە رووژیگ فەرمی ئەرا شەهید فەیلی، وەگەرد دیاریکردن پارچە زەوییگ ئەرا قەورسان شەهیدەیل فەیلی.
دیاری کرد کە حکومەت فەرمانیگ دەرکرد ئەرا ئاسانکردن ریکارەیل دەرکردن ڕەگەزنامە و راسەوکردن توومارەیل تایبەت وە کوردەیل فەیلی، و دەسەیگ ئەرکدار کریا ئەرا وەشوینکەفتن کارەیل ئی پێکهاتە.
سودانی لە قسەیلی دووپات لە گرنگی وەردەوامی حکومەت لە لاوردن ریگریەیل لە نوای کارەیل مافەیل فەیلیەیل، و داوای هەماهەنگی وەرد دادگایەیل کرد ئەرا وەشوینکەفتن پرسەیل یاسایی لەبان ئەوانەگ دەسیان لەناو تاوانەیل وەبان ئی پێکهاتە بویە، و فەرمان بەرزکردن تەقەلایل ئاوەدانکردن ناوچەیل میژووی کوردەیل فەیلی لە ناوچەیل پارچەی سنووری کرد، و دابینکردن دەرفەت کار ئەرایان.
لە کۆتایی قسەیلی، سودانی دووپات کرد کە ئەو پشتگیریە کە حکومەت ئەرا خاوەن شەهیدەیل فەیلی پیشکەش کەێد، بەشیگە لە ئەرک خوەی وەرانوەر ئەو قوربانیەیل مەزنیانە.
