گەرمیان.. کابرایگ لەوەخت راوەماسی گیان لەدەسدەێد
2025-05-28T14:29:13+00:00
شەفەق نیوز/ قسەکەر پۆلیس گەرمیان عەلی جەمال قەدووری، ئمڕوو چوارشەممە، راگەیان لەوەخت راوەماسی کەسیگ وە کارەبا گیان لەدەسدا.
قسەکەرەگە لە بەیانامەیگ رایگەیان، دویای ئەوەگ سێ کەس وە مدوو راوەماسی چگنەس بان چەم سیروان کارەبا لە ئاوەگە دانە لە ئەنجامیەکیگیان وەناو (عومران محمد ساڵح) لەداڵگبوی 1996 دانیشتگ کانی کرمانج وە مدوو کەفتنەوەر کارەبا گیان لەدەسدا.
دیاریکرد، دەسوەجی پۆلیس بنکەی ناحیەی مەیدان چگنەس شوین رویداوەگە دویای کلکردن تەرمەگە ئەرا پزیشک داد دەربەندیخان دەسگردنە وەبان مۆلیدە و ئەو کەرەستەیلە کەئەرا راوکردن وەپیان بویە.
ئاشکرایکرد، ئەو دوو کەسە کە مەوقەی رویداوەگە وەگەردی بوین وەناوەیل (ع- م -ع ) وە ( س -ع - م) وەبڕیار دادوەر و وەپای مادەی 28 ی راوکردن گیاندارەیل ئاوی دەستگیرکریان و لێکۆڵینەوە لەڕوداوەگە وەردەوامە.
