ئەرا یەکەمین جار لە عراق.. جادەیگ وەناو "کوردەیل فەیلی" لە بەغداد (وینە)

شەفەق نيوز/ بەغداد پایتەخت، ناو "شەهیدەیل کورد فەیلی" نادە قەی جادەی فەلەستین، کە وە یەکەمین جادە وەی ناوە دریەێدە قەڵەم.

کامیرایل ئاژانس شەفەق نیوز گرتە وینەیلیگ توومار کرد کە ئەو تابلۆەیلە نشان دەن کە ناو کوردەیل فەیلی هەڵگردنە لە جادەیگ کە سەدان دوکان بازرگانی ت نویسینگە هاناوی، کە هێمایی گرنگیگ دیرێد، و نوینەرایەتیی نشانەی دیاریگ هەڵگرێد ئەرا ئەو زیانە کە کوردەیل فەیلی لە سەردەم رژیم وەرین تویشیان هاتن.

 لەلای خوەییش، فوئاد عەلی ئەکبەر سڵاکار کاروبار فەیلیەیل لە پەرلەمان عراق ئەرا ئاژانس شەفەق نیوز وت: جادەگە لە چواڕییان نەهزە دەسوەپی کەێد تا رەسێدە کۆتایی شار سەدر، کە جاران ناوی "جادەی سەورە" بوی.

لە ساڵ 2017، فوئاد عەلی ئەکبەر دووپات کەێد کە رەزامەنی لەبان ئاڵشتکردن ناوەگە ئەرا "جادەی شەهیدەیل کورد فەیلی" وەرگریا، کە یەکەم جارە لە عراق ئی ناوە وەقیەو بنریەێد، و لەلایەن ئەنجومەن پارێزگای بەغداد دەنگ وەپی دریا.

وتیش: وەرجە ماوەیگ چەوم کەفتە سەرۆک کۆمار، و رەزامەنی کۆتایی لەبان ئی ناوە دریا، و ئی کارە کاریگەری ئەرێنی دیرێد لەبان دەروین خەڵک و خاوەن شەهیدەیل.

 کوردەیل فەیلی، کەفتنە وەر بارکردن و ئاوارەکردن و جینۆساید لە سەردەم رژیم لەناودریای.

تاریق مەندەلاوی سڵاکار سەرۆک وەزیرەیل ئەرا کاروبار کوردەیل فەیلی ئویشێد: ئی چینە شمارەی گەورەیگ دیرن لە دەزگای شەهیدەیل، کە 16,350 شەهید لەلایان توومار کریاس.

هەرچەن ئەو بڕیارەیل دادوەریە دەرچگن کە ئەوەگ وەسەر کوردەیل فەیلی هات وە تاوان جینۆساید دانە قەڵەم، دویاترینیان بڕیار دادگای تاوانی باڵا لە ساڵ 2010 بوی، وەلێ چەن دامودەزگایگ فەرمی هیمان پاپا کەن لە جیوەجیکردن ئەو یاسایلە و دادپەروەری قوربانیەیل.