دویای ئاخڵەدانی هەڕەشەی خوەیکوشتن کەێد.. دەسگیرکردن زیندانی هەڵهاتگیگ لە دهۆک

شەفەق نیوز/ سەرچەوەیگ ئەمنی، ئمڕوو پەنجشەممە، خەوەردا دەسڵاتدارەیل ئەمنی توەنستنە توومەتباریگ کە وایە دەسگیربکەن کە لە زیندان چاکسازی "زرکا" لە پارێزگای دهۆک وایە.

سەرچەوەگە وە ئاژانس شەفەق نیوز راگەیان، دەسگیرکردنەگە  لە ساعەتەیل دیر وەخت دویەشەو بویە لەناو یەکیگ لە بوسانەیل ئاوای "بێستانی" سەر وە ناحیەی "قەسرۆک" لە خوەرهەڵات دهۆک.

ئاشکرایرد، "توومەتبارەگە چەک هەڵگردوێد و هەڕەشەی هێزەیل ئەمنی دایە وە کوشتن خوەی، باوجی مەفرەزەیل توەنستنە لە کۆتایی کۆنترۆلی بکەن وەبی کەلەمەداری دەسگیری بکەن" دووپاتکرد زیندانیەگە دوارە بەند کریاس.

دیاریکرد زیندانیەگە ناوی "حەسەن کان"ە سزای زیندانیکردن هەمیشەیی دریایە وە تاوان کوشتن، شەوەکی دویکە توەنست لە یەکیگ لە خەستەخانەیل شار دهۆک بواید لە دویای ئەوەگ بیمار بوود.