بارزانی وسودانی دووپات لە هەماهەنگی ناوەین لایەنەیل عراقی کەن ئەرا وەپشتسەرنان قەیران و سەختیەیل
شەفەق نيوز/ هەرلە ریبەر کورد مەسعود بارزانی، و محمد شیاع سودانی سەرۆک وەزیرەیل عراق، ئمڕوو شەممە، دووپات لەبان گرنگی هەماهەنگی ناوەین لایەنەیل عراقی کردن، ئەرا وەپشتسەرنان قەیران و سەختیەیل و چارەکردن گیچەڵەیل لە وڵات.
بارەگای بارزانی لە بەیاننامەیگ رەسیە ئاژانس شەفەق نیوز وت: بارزانی لە سەیرانگەی سەڵاحەدین پیشوازی لە سودانی کرد.
وتیش: لە دیدارەگە باس رەوشەیل سیاسی و دویاترین ئاڵشتبویەیل و نووەوبویەل لە ئاست هەرێمی کریا.
وەگورەی بەیاننامەگە، پەیوەندییەیل ناوەین حکومەت هەرێم کوردستان و حکومەت فیدڕاڵی عراق باوەتیگ ترەک بوی لەناو دیدارەگە.
شەوەکی ئمڕوو شەممە، محمد شیاع سودانی سەرۆک وەزیرەیل عراق، رەسیە شار هەولێر پایتەخت هەرێم کوردستان.
وەرجەیە، مەسروور بارزانی سەرۆک حکومەت هەرێم کوردستان، و شمارەیگ لە وەزیر و وەرپرسەیل لە پیشوازیکردن سودانی و شاند یاوەری بوین لە فڕوکەخانەی ناودەوڵەتی هەولێر.
پەیامنێر ئاژانس شەفەق نیوز وت: هەردوگ لایەن ئەوەسا باس بڕیگ باوەت دەیشت وناو وڵات کەن، لەناویان پرسە گیرهاتگەیل ناوەین هەولێر و بەغدا.
وتیش: مەسروور بارزانی و سودانی هەمیش باس پرس دووارە هەناردەکردن نەفت هەرێم لەڕی بەندەر جیهان تورکی کەن.
یە پەنجەمین سەردانە وەلایەن سەرۆک حکومەت عراق لە وەختیگ پۆستەگە گردیە ئەرا هەرێم کوردستان، و دویانڵین سەردانی لە تشرین دویەم ساڵ 2024 بوی.
