بارزانی لە پەیام روونیگ: بایەدە پەکەکە کۆتایی وە داگیرکردن هەرێم کوردستان بارێد
شەفەق نیوز/ مەسعود بارزانی سەرکردەی کورد، ئمڕوو دووشەممە، هووشداری لە خراوبوین رەوشەگان کرد لەوەر ململانەی ناوبەین تورکیا و جەنگاوەرەیل پەکەکە لەناوچە سنووریەگە لە هەرێم کوردستان، وداوا لە پەکەکە کرد کۆتایی وە داگیرکردن ئەو ناوچەیلە بارێد ئەرا نواگردن لە ململانەیلیگ زیاتر و تا رەشەگان ئەرا سروشت خوەیان بانەو.
بارزانی لە پەیامیگ ئەرا رای گشتی کوردستانی ئاڕاستەی کرد، و رەسیە ئاژانس شەفەق نیوز وت: لەی رەوشەیل ئیسە لەو قەیرانەیلەگ وڵاتەگەمان کەفێدە وەریان، گرنگە داوا لە گشت کوردستانیەگان بکەم وەشیوەیگ راستەقینە وەگەرد ئی رەوشەبلە رەفتار بکەن، و بکەفنە ئاست وەرپرسایەتی مێژووی وەرەو هاوردنەوەی رەوشەگان ئەرا سروشت خوەیان و کۆتاییهاوردن وە ناکۆکیەگان.
وتیش؛ مێژوو شایەتە، و شانازی کەیمن ک ئیمە حەرام جەنگ کورد- کورد کردیمن، چوونکە گشت لایەنەگان فرە زەرەدمەن بوین لە جەنگ و ناکۆکیەگان.
بارزانی وتیش؛ وەلی بایەدە ئی هەڵوێستمانە وبەدی وکارناریەێد ئەرا نواگردن دەسەڵات یاسایی لە هەرێم کوردستان، و تەقەلای زاڵبوین وە زوور چەک و وەشیوەیگ نا یاسایی لەبان گەل کوردستان.
وتیش؛ نەبایەد هەڵوێستەگەمان لە حەرام کردن جەنگ کورد وە کورد لە شیوانن ئاسایش وئارامی شار و ئاوایەیلمان، وناچارکردن خەڵکەگە لە ویڵکردن ماڵەیل وداراییان، و بوونە قوربانی، و وەبی حەق شەهید بکریەن و وەبی قسەکردن لە کەسیگ.
بارزانی ئاماژە کرد ک دویای پەلامارەیل داعش، پێشمەرگە پاڵەوانەگان لەنوایان وسیان، و فرە لە ناوچە سنووریەگان هیشتنە جی و وروی کرنە جەنگ داعش.
هەمیش وت؛ وەداخەو ک لەو وەختە و لەجیای پشتگیری ئەزموون هەرێم کوردستان عراق، جەنگاوەرەیل پەکەکە ئەو ناوچەیلە داگیرکردن و خوەیان لەجیای حکومەت هەرێم چەسپانن، و ریگری لە هاووڵاتیەگان کردن لە ئاوەدان کردنەوەی ئاوایەیلیان، وهەمیش باجەیل چەسپاننە بان هەر کەسیگ سەردان ناوچەگە بکەێد.
بارزانی جەختکرد؛ وەبی گومان ئی رەفتارەیلە گونجیاگ نیین، و هەڵوێستە نیشتمانیەگان لە کردەوە چەسپیەن نەگ لە قسە.
و ئاماژە کرد ک گرنگە هویرەو بکەن ک خوەیان لە سەرەتای دەسکردنیان وە چالاکیەیلیان گشت پشتگیرییگ ئەرایان پێشکەش کردیمن، بەڵکم ئەوان وە پێچەوانەی ئی هەڵوێستە رەفتار کردن، و ئیجا لە چەن قۆناغیگ جەنگ لە نوامان کردن، و لەئەنجامەگەی گشت لایەنەگان زەرەدمەن بوین.
بارزانی وتیش؛ ئەو ناوچەیلە ک جەنگاوەرەیل پەکەکە داگیری کردن، بایەدە بانەو ئەرا دەسەڵات شەرعی و یاسایی هەرێم، وبایەدە گشت ئەو ناوچەیلە ک وە زوور چەک داگیری کردن و بوینە هەست رخبردن هاووڵاتیەیل هەرێم کوردستان بیلنە جی، و ئاماژە کرد ک سەدان لەو ئاوایەیلە هەس ک لەوەر هەسی ئەندامەیل پەکەکە ئاوەدان نەکریان، و بوینە مەیدانەبل جەنگ.
بارزانی لە کۆتایی پەیامەگەی وت: ئەرا ئەوەگ رەوشەیل وڵاتەگەمان لەیە زیاتر خراو نەوون، و ئەرا ئاوەدانکردنەوەی ناوچە ویرانکریایەگان و کۆتایی هاوردن وە ژاوەژاوەگان، گرنگە گشت لایەنەگان ری نەیەنە لایەنەیلیگ هەوڵ چەسپانن خوەیان دەن، و بایەدە پشتگیری خەبات وقوربانیەیل پێشمەرگە وگەل ستەمدیدەمان بکەن، ولەی قۆناغە بکەفیمنە ئاست وەرپرسایەتی.
