بارزانی یاد لەیلا قاسم کەێد: سومبول خەبات ژنەیل کوردە وەرانەور نادادپەروەری

شەفەق نيوز/ مەسعود بارزانی ریبەر کورد، ئمڕوو دووشەممە، وە پەیامیگ سووزدار یاد پەنجاویەکەمین ساڵیاد وەسێدارەدان ژنە خەباتکار کورد فەیلی لەیلا قاسم و هاوڕیەیلی کرد لە ساڵ 1974 لە بەغداد وەدەس رژیم وەرین.

بارزانی لە پەیامەگەی کە لەبان هەشمار فەرمی خوەی لە پلاتفۆرم ئێکس وت: لەیلا قاسم نموونەیل بوی ئەرا ئازایی ژن کورد، و سومبولیگ ئەرا خەبات مەرد کورد ئەرا ئازادی، و ئافەرین لە خوەیڕاگریی و قوربانیکردن ژیانی کرد وەبی سەرچەمانن و خوەیوەدەسدان.

 بارزانی وتیش: لە پەنجاویەکەمین ساڵیاد وەسێدارەدان و شەهیدبوین لەیلا قاسم و هەڤاڵەیلی، هەزاران سڵاو لە گیان پاکیان کەیمن، و لە گیان گشت شەهیدەیل ری ئازادی.

ماڵ کورد فەیلییەیل، رووژ شەممەی گوزەشتە ساڵیاد پنجا و یەکساڵەی لە سێدارەداین چالاکوان فەیلی لەیلا قاسم کرد لە شار هەولێر پایتەخت هەرێم کوردستان.

لەیلا قاسم، سیاسەتمەداریگ کورد فەیلی بوی لە شار خانەقین لە 27 کانون دویەم ساڵ 1952 لەداڵگ بویە، وەگەرد پارت دیموکرات کوردستان کار کرد لە سەرەتای ساڵ هەفتایەیل سەدەی گوزەشتە.

دەسکردە خوەنستن لە زانکۆ لە کۆلێژ ئاداب زانکۆی بەغداد بەش زانست کۆمەڵناسی لە ساڵ 1971 و لە 29 نیسان ساڵ 1974 وەلایەن حکومەت عراقی دەسگیرکریا و 12 ئایار 1974 لە سێدارەیدان.