بەرەی فەیلی هەشتەم موومی کوورەو کەێد و هویر لە چگن ئەرا هەڵوژاردن کەێد.. وینە
شەفەق نيوز/ بەرەی کورد فەیلی، ئمڕوو شەممە، لەناو بارەگای خوەی لە بەغدای پایتەخت فیدڕاڵی، ئاهەنگ هەشتەم ساڵیاد دامەزریانی کرد، وە ئامادەبوین بڕیگ لە وەرپرسەیل و ریخریاگەیل کۆمەڵگای مەدەنی.
لەو ئاهەنگە کە ئاژانس شەفەق نیوز ئامادەی بوی، وتار لەباوەت تەقەلایەیل بەرەگە و جویلەی وەردەوامی پیشکەش کریا ئەرا دادپەروەریکردن چین فەیلی وە گلەوداین مافەیلیان وەگورەی دەستوور و یاسا.
هەرلیوا، ماهر رەشید فەیلی سکرتێر گشتی بەرەگە دووپات کرد کە بەرەی فەیلی لەو حزبەیلەسە کە واژوو فەرمی و یاسایی لەبانی کریاس، و تایبەتمەنە وە کاروبار فەیلیەیل، و داوا لە گشت کوردەیل فەیلی کرد پشتگیری بەرەگە بکەن و لایەنگری بوون ئەرا گلەوداین مافەیل.
وتیش: بەرەی نیشتمانی پشتگیری لە گشت هیزەیل فەیلی کەێد، وەلێ ئیرنگە هویر وە دروسکردن هاوپەیمانییگ نییە جویراجویر لایەنەیل فەیلی بگرێدەو، وتیش: بەرژەوەنیە تەنگەیل لەلایەن بەشیگ لە لایەنە سیتسیە گەورەیل لەناو عراق، هاپشت ریگریکردن لە تەقەلایل گلەوداین مافەیلیان فەیلیەیل، کە ئەوسا و ئیسە زیان لە بیبەشی و زەفتکردن مافەیل دیرن.
سکرتێر گشتی بەرەی فەیلی وتیش: بەرەی نیشتمانی بڕیگ دەسکەفت وەجیهاورد لە گلەوداین موڵکەیل چین فەیلی، و بڕیارەیلیگ حکومەتی لەی باوەتە دریا، وەلێ وەکارخستن ئەو بڕیارەیلە هیمان یەواشە.
لەلای خوەییش، حەمید رەشید جیگر سکرتێر گشتی بەرەی نیشتمانی کوردەیل فەیلی، دیاری کرد کە ئاهەنگ هەشتەم ساڵیاد دامەزریان بەرەگە لە وەختیگ تیەێد حزب و لایەنەیل سیاسی ئامادەکاری کەن ئەرا هەڵوژاردن پەرلەمان، دووپاتیش کرد کە بەرەی فەیلی حزبیگ سیاسیە و ماڵیگ گەورە و وازە ئەرا گشت کوردەیل فەیلی.
رەشید لە قسەیلی ئەرا ئاژانس شەفەق نیوز وتیش: لە دیارترین ئامانجەیل بەرەی فەیلی هەڵگردن ئەو ستەمە کە رەسیەسە ئی چینە، و بەرەی نیشتمانی تەقەلای فرەیگ دەێد ئەرا چەسپانن مافەیل کوردەیل فەیلی، وتیش: بەرەی نیشتمانی کوردەیل فەیلی هویر وە دروسکردن هاوپەیمانییگ وەرۆ ئەو حزبەیل کەێد ئەرا چگن وەناو هەڵوژاردن هاتگ، دویای ئەوە کە زیاتر لە حزبیگ مکیس هاوپەیمانانی وەگەردی کردن، ئەرا دروسکردن فراکسیۆنیگ، و دویاتر بڕیار گونجیاگ لەی باوەتە دریەێد.
لەلای خوەییش، شامل فەیلی جیگر سکرتێر گشتی بزۆتنەوەی وەلا، داوا لە گشت هیز و لایەنەیل فەیلی کرد، وەگورەی وەرپرسیارێتی بوون، و پشتیەک بگرن ئەرا دادپەروەریکردن کوردەیل فەیلی.
فەیلی لە قسەیلی ئەرا ئاژانس شەفەق نیوز وت: ئاهەنگ دامەزریان بەرەی فەیلی، سویریگ نیشتمانیە ئەرا گشت فەیلیەیل، لەوەر چەسپبان هەڵوێستی لە وەرگریکردن لەی چین ستەمدیدە لە بوونەیل سیاسی و ناودەوڵەتی.
هەرلیوا، سەباح نورەددین خانمە وەرپرس ژن لە بەرگە، دووپات لە گرنگی پشتگیریکردن هیزەیل سیاسی عراقی ئەرا کوردەیل فەیلی و هەڵگردن زیانیان کرد.
لە قسەیلی ئەرا ئاژانس شەفەق نیوز دووپاتیش کرد کە زیان ئی چینە وەرپرسایەتی جویلەکردن و وەرگریکردن لەلیان و توانادارکردنیان ئەرا گلەوداین مافەیلیان خەێدە بان گەردن ئیمە و گشت لایەنەیل سیاسی فەیلی و هیزەیل نیشتمانب عراقی.
