بەیاننامەیگ ئەمنی لە کوردستان: ئەو دڕۆنە کە لە هەولێر کەفتیە بومبدار بویە و کەسیگ زەخمدار نەویە

شەفەق نيوز– هەولێر 

دەزگای دژە تیرۆر لە هەرێم کوردستان، شەوەکی ئمڕوو دووشەممە، وەخوارکەفتن درۆنیگ بومبی لە ناحیەی رزگاری سەروو قەزای خەبات لە پارێزگای هەولێر راگەیان، وەبی زەخمداری کەسیگ.

دەزگاگە لە بەیاننامەیگ رەسیە ئاژانس شەفەق نیوز وت: رویداوەگە لە ساعەت 05:50 شەفەق بویە، دووپاتیش کرد کە ئەو درۆنە کەفتە خوارەو وەبی زەرەدیگ گیانی (خوەشبەختانە) وەگورەی بەیاننامەگە.

وەرجەیە سەرچەوەیگ ئەرا ئاژانس شەفەق نیوز وت: دوو درۆن کەفتنەسە لە قەزای خەبات سەروە پارێزگای هەولێر پایتەخت هەرێم کوردستان، یەکەمەگە لە ئاوا كورگوسك کەفتیە، و دویەمەگە کەفتیەسە بان چایخانەیگ لە ناحیەی رزگاری.

تا ئیسە ئەو لایەنە کە درۆنەیل کلکردیە نەناسیاس.