واران و تەم ئاسمان پووشێد.. کەشناسی عراق تا سەرەتای هەفتەی ئایندە
دەسەگە لە بەیاننامەیگ رەسیە ئاژانس شەفەق نیوز وت: کەشوهەوای وڵاتەگە ئەرا سوو چوارشەممە، لە ناوچەی ناوڕاس و باشوور رووشنە و مەوقەی شەوەکی تەم دروس بوود، ولە ناوچەی باکوور رووشنە وەگەرد لەکە ئەوریگ، و شەوەکی تەمە، و پلەی گەرمی لە گشت وڵاتەگە نزیک رووژ وەرجە خوەیە.
وتیش: رووژ پەنجشەممە، لە گشت وڵاتەگە رووشنە تا نیمچە ئەورە، و پلەی گەرمی نزیک رووژ وەرجە خوەیە.
دیاری کرد کە رووژ جمعە، لە ناوچەی ناوڕاس نیمچە ئەورە وەگەرد نمە وارانیگ لە بەشەیل خوەرھەڵات، و لە ناوچەی باکوور نیمچە ئەورە وەگەرد واران لە ناوچەیلیگ جیاجیا و لە بان کویەیلە وەفرەوارێد، ولە ناوچەی باشوور نیمچە ئەورە، و پلەی گەرمی لە بەشەیل ناوڕاس و باشوور کەمیگ بەرزەو بوود، و لە ناوچەی باکوور چەن پلەیگ نزمەو بوود.
دەسەگە وتیش: کەشوھەوای وڵاتەگە ئەرا رووژ شەممەی ئایندە، لە ناوچەی ناوڕاس رووشنە تا نیمچە ئەورە، و لە ناوچەی باکوور نیمچە ئەورە تا ئەور تەواوە وەگەرد واران لە شوینەیلیگ جیاجیا و لە بان کویەیلە وەفر وارێد، و لە ناوچەی باشوور نیمچە ئەورە تا ئەور تەواوە وەگەرد وارانیگ لە شوینەیلیگ جیاجیا، و پلەی گەرمی لە گشت وڵاتەگە نزیک رووژ وەرجە خوەیە.
