واران و بانوخواركردن پلەی گەرمی.. کەشوهەوای عراق لەی رووژەیل بانانە
دەسەگە لە بەیاننامەیگ رەسیە ئاژانس شەفەق نیوز وت: سوو یەکشەممە، لە ناوچەی ناوڕاس نیمچە ئەورە، و لە ناوچەی باکوور نیمچە ئەورە تا ئەور تەواوە، وەگەرد دەرفەت نمە وارانیگ، و لە ناوچەی باشوور نیمچە ئەورە، و پلەی گەرمی لە بەشەیل ناوڕاس و باکوور کەمیگ بەرزەو بوود، و لە بەش باشوور جویر خوەی مینێد.
وتیش: رووژ دووشەممە، لە بەشەیل خوەرئاوای ناوچەی ناوڕاس رووشنە و بوودە نیمچە ئەور، و وەشەو نمە وارانیگ وارێد، و لە ناوچەی باکوور و باشوور نیمچە ئەورە، و پلەی گەرمی لە گشت ناوچەیل وڵاتەگە نزیک رووژ وەرجە خوەیە.
دیاری کرد کە رووژ سێشەممە، لە بەشەیل خوەرئاوای ناوچەی ناوڕاس نیمچە ئەورە وەگەرد نمە وارانیگ، و لە شوینەیلیگ جیاجیا لە ناوچەی باکوور ئەور و وارانە، و لە ناوچەی باشوور نیمچە ئەورە، و پلەی گەرمی لە ناوچەی ناوڕاس و باشوور نزیک رووژ وەرجە خوەیە، و لە ناوچەی باکوور کەمیگ نزمەو بوود.
دەسەگە وتیش: رووژ چوارشەممەی ئایندە، لە ناوچەی ناوڕاس و باشوور ئەور و وارانە، و لە ناوچەی باکوور ئەورە وەگەرد نمە وارانیگ، و پلەی گەرمی لە گشت ناوچەیل وڵاتەگە کەمیگ نزمەو بوود.
