کپەوکردن ئاگر گەپیگ رەسیە بازاڕەیلیگ جەماوەری لە بەغداد

شەفەق نیوز/ تیمەیل وەرگری مەدەنی، ئمڕوو جمعە، توێنستن ئاگر گەورایگ لەناو بازاڕ جەماوەری حەی عامل لە باشوور بەغداد کپەو بکەن.

وەڕێۆبەرایەتیەگە وت: ئاگرەگە لەناو ٣٠ دوکان بازرگانی هەڵسیا، ک وە «ساندویچ پەنەڵ» زوی ئاگرسین دروس کریانە، و پێشێلکاریە لە رینمایل سەڵامەتی و ئاسایش، و تیمەیل وەرگری مەدەنی توێنستن ٣٦٠ دوکان بازرگانی هاوسا لە ئاگرەگە دەرباز بکەن، و نواگیر ئاگرەگە لە رەسینی وەرەو ماڵەیل نزیک بازاڕەگە کردن.

وتیش؛ ئاگرەگە وەبی تۆمارکردن زەردەیلیگ مرۆیی وەگەرد کەمەوکردن زەرەدە داراییەکان کپەو کریا، و لەبان ئەوە، وەرگری مەدەنی داوای کردنەوەی لێکۆڵینەوەیگ لەناوەند پۆلیس ناوچەگە کرد، وەپشتبەسانن وە راپۆرت پسپۆر بەڵگەنامە تاوانیەکان، ئەرا زانستن هووکارەیل سەرەتایی گوڵپەی ئاگرەگە.