پەنج شار عراقی لەناو لیست گەرمترین ناوچەیل جەهان

شەفەق نیوز- وەدۊاچگن

داتایەیل چەودیاری کەشوهەوای جەهانی، ئمڕوو چوارشەممە، دەرخستن توومارکردن 5 ناوچەی عراقی لەناو لیست بەرزترین 15 پلەی گەرمی لەبان ئاست جەهان لەماوەی چوار و بیس سەعات گوزەشتە.

بالدی بیکۆن لە بەلیز کەفتە سەرەتای لیستەگە، دۊای ئەوەگ 53.3 پلەی سەدی توومار کرد، و دۊای ئەو ئومیدیەی ئیرانی وە 50.2 پلەی سەدی، ئیجا بەندەر ماهشەهر ئیرانی و فرۆکەخانەی ناودەوڵەتی کوێت وە 49.9 پلەی سەدی ئەرا هەر یەکیگیان.

 بستان ئیرانی لە پلەی پەنجەم جەهانی هات، وە پلەی گەرمییگ کە رەسیە 49.8 پلەی سەدی، لە وەختیگ فڕگەی بەسرەی ناودەوڵەتی عراقی لە پلەی شەشەم هات، دۊای ئەوەگ 49.7 پلەی سەدی توومار کرد.

 میهران ئیرانی لە پلەی هەفتەم هات وە 49.5 پلەی سەدی، و دۊای ئەو ئابادان ئیرانی وە 49.4 پلەی سەدی، لە وەختیگ ناحیەی کووت حەی عراقی لە پلەی نۆهەم جەهانی هات، وە پلەیگ کە رەسیە 49.3 پلەی سەدی.

 دیهلەران ئیرانی 49.2 پلەی سەدی توومار کرد تا بچوودە پلەی دەيەم، وە یەکسانی وەگەرد ریفاعی عراقی کە لە پلەی یانزهەم هات وە خود پلە.

 سەفی ئاباد دزفووڵ ئیرانی لە پلەی دوازدەم جەهانی هات، وە پلەی گەرمییگ کە رەسیە 49 پلەی سەدی، لە وەختیگ ناسریەی عراقی لە پلەی سیانزەهەم هات، و سەماوەی عراقی لە پلەی چواردەهەم، دۊای ئەوەگ 48.9 پلەی سەدی توومار کردن ئەرا هەر یەکیگیان.

ئەهواز ئیرانی لیست بەرزترین 15 پلەی گەرمی لە جەهان کووتایی هاورد، دۊای ئەوەگ 48.8 پلەی سەدی توومار کرد.