له پرووسه‌يگ ئه‌منى له ئه‌نبار 15 داعشى كوشيان و 13 بنگه‌يش ويران كريان
شه‌فه‌ق نيوز/ حه‌شد عه‌شايرى له قه‌زاى حه‌ديسه له خوه‌رئاواى ئه‌نبار باس له ده‌رئه‌نجام ئه‌و پرووسه‌يل ئه‌منييه كرد ك ئه‌نجاميان داگه وه‌هاوبه‌شى وه‌ل سوپا ئه‌را راوناين پاشماوه‌يل داعش و ئه‌و تيرۆرسته‌يله ك دزه ئه‌كه‌ن له‌ناونى مه‌رز پاريزگايه‌يل خوه‌رئاوا.
له‌ى باوه‌ته‌و، عه‌واد جغێقى وه‌رپرس حه‌شد ئه‌را شه‌فه‌ق نيوز وت: حه‌شد حه‌ديسه وه‌هاوبه‌شى و هه‌ماهه‌نگى وه‌ل هيزه‌يل سوپا و فه‌رمانده‌يى جزيره پرووسه‌يليگ يه‌كلاكه‌ر سه‌ربازى له مانگ ره‌مه‌زان له مه‌رزه‌يل ئه‌نبار و ناوچه‌يل بياوان وه‌ل پاريزگايه‌يل نه‌ينه‌وا و سه‌ڵاحه‌دين ئه‌نجام داگه‌و له‌و پرووسه‌يله 15 تيرۆريست داعشى كوشيانه‌و 13 بنگه‌و حه‌شارگه‌ى ئه‌و ريكخرياگه ويران كريانه‌و وه‌ل بڕيگ كه‌ره‌سته‌يل تر.
جغێقى باس له‌وه‌يش كرد پرووسه سه‌ربازيه‌گه وه‌رده‌وامه ئه‌را راوناين و له‌ناوبردن پاشماوه‌ى داعش له بياوان ئه‌نبار، ئاماژه وه‌يه‌يش كرد شماره‌ى ئه‌و تيرۆريسته‌يله ك دزه ئه‌كه‌ن له‌ناونى مه‌رز پاريزگايه‌يل خوه‌رئاواو ئه‌نبار كه‌مه‌و وه‌ته‌واوى هانه ژير كۆنترۆڵ.
