كازمى داوه‌تنامه‌يگ ئه‌را سه‌ردان چين وه‌پى ره‌سێ
2020-05-23T20:54:07+00:00
شه‌فه‌ق نيوز/ ئمڕوو شه‌ممه چين پيروزبايى له مسته‌فا كازمى سه‌رۆك وه‌زيره‌يل كرد وه بوونه‌ى وه‌رگرتن پۆسته‌گه‌ى و ئاشكراى پشتگيريكردن چين ئه‌را عراق كرد له كاره‌يل روێ وه‌ڕوێ بوينه‌وه‌ى تيرۆر و داوايش له كازمى كرد سه‌ردان په‌كين بكا.
له‌ى باوه‌ته‌و، سه‌رۆكايه‌تى وه‌زيره‌يل له به‌ياننامه‌يگ ك روينويسيگى ره‌سيه ئاژانس شه‌فه‌ق نيوز وت: مسته‌فا كازمى سه‌رۆك وه‌زيره‌يل پيشوازى له تشانگ تاو باڵێۆز چين له به‌غدا كردگه.
باس له‌وه‌يش كرد باڵيۆز چين پيروزبايى له كازمى كردگه وه‌بوونه‌ى وه‌گرتن پۆست سه‌رۆكايه‌تى حكومه‌ت و سڵام و ريز سه‌رۆك ده‌وڵه‌تى چينى وه‌پى ره‌سانه‌و باس له په‌ره‌داين وه په‌يوه‌نديه‌يل وه‌ل عراق كردگه.
