زەردەیلیگ ئابووری گەورایگ لەوەر لافاوە ئیرانیەگان لە دیالە
شەفەق نیوز/ وەرپرسیگ حکومەتی لە پارێزگای دیالە، ئمڕوو جمعە، هووشداری لە بڕین و رمانن رییگ ستراتیژی دا ک دیالە وە پارێزگا باشووریەگان بەسێدەو، لەوەر لافاوە ئیرانیەگان، و داوا لە حکومەت کرد دەسوەردان بکەێد و ریەگە خاسەو بکەێد و لە زەردەیلیگ ئابووری گەورایگ لا بیەێد.
مازن خوزاعی وەڕێۆبەر ناحیەی قەزانیە ئەرا ئاژانس شەفەق نیوز وت: ری دیالە - واسیت کەفتە وەر ویرانکردن نیمچە تەواوەتییگ لەوەر لافاوەیل ئیران ک بویە هووکار لە ماڵین و رمانن پارچەیلیگ لە ریەگە لە چەن شوونیگ، ک هیشتەی وەکار رەدبوین کاروانە بازرگانیەگان لەناونی دیالە و پارێزگا باشووریەگان ناێد.
وتیش حکومەت و وەزارەتە پەیوەندیدارەگان هیچ پویلیگ ئەرا خاسەوکردن ریەگە تەرخان نەکردن، هەرچەن ئی ریە گرنگییگ ستراتیژی و بازرگانی دیرێد، و ئەو برینە ک ئەرا دیالە وەگەرد پارێزگا باشووریەگان کەێدەی، و دیاری کرد ک ریەگە زیاتر لە ٧ ملیار دینار خوازێد تا خاسەو بکریەێد.
