رووداو جەهانی شێعر "المربد" دە "بەسرە"
شەفەق نیوز/ لە رووژ چوارمەو، سی و چوارمین دەورەێ فستیواڵ ناودەوڵەتی شێعر "المربد" دە شار "بەسرە"ێ عراق نریاوە.
"موحەمەد ئەمین ئەلکەرخی" شاعر عراقی، دە ئی بارە وتگە: ئی رووداو نرخدار و خاون‌ڕێز ناوچەئییە هە لە زوونان و جاران دە ئێرە باو بییە و بهەرزییەگەێ هن یەسە ک ئێسە فستیواڵێگه سەروەخوەێیە و سەر وە هیچ کام لە دەسهەڵاتدارەێلە نییە.
ئەوی وە ریشگ‌دار بیین ئی رووداوە هشارەێ داگە و وتگە: دە ئەێت رژیم "بەعس سەددامی" وەداخەوە ئی جەژنوارە وەرەو گەنی بردنەسەێ ئوو کردنەسەێ وە تریبوونێ ئەڕا شێعر خوەنستن لەبەد سەددام و وەزم و تاریف داین درووکانی خاسییەێل نەداشتگ ئەو دیکتاتورە خوێنمژە ک ئی کارە دە شێعر باو نەبییە و نییە.
"الامین" ک خوەییش لە بن و بنچەکەو فارس‌زوان بییە وتگە: چشتێ ک فرەتر نرخ داگە وەێ فستیواڵە یەسە ک گشت گەل‌وهووزێ دە ئی جەژنوارە بەشداری دکەن و هە هن عەراوەێلە نییە.
خاسە بزانن ک چین نووی دامەزرانن ئی فستیواڵە لە ساڵ 1971 زایەنی بنەڕاێ نریاگە و چشتێ بییە جوور "عکاظ" ئوو نامەگەێ لە نام بازاڕ "المربد" ک جوور "عکاظ" جی کووم‌ئەڵهاتن شاعرەێلەێش بییە و دە شار "زوبەیر" دە نزیکی "بەسرە" بییەسەێ ، گیریاگە.
"سەڵمان گاسەد" بەرپرس یەکییەتی نویسکارەێل بەسرەێش دە ئی فستیواڵە وتگە : المربد، خوەێ چشت دیاریێگە دە ئەدەبیات عەراوی و دە ناوچەگە و دە ناودەوڵەتانیش هە لەێ‌وا بییە ئوو ئیمە ئەڕا خاستر نریانێ دایمنە موتاڵعاتێ کردنە دە بانێ ک هەم دەسکەفتەێل ئەو موتاڵعاتە دگریمنە وەر چەممان، هەمیش دکەیمنێ کتاوێ تا گشت لە خاسی و کەم و کورتییەێلەێ کارەگەمان ئەوبڕەسنەو.
سی و چوارمین دەورەێ فستیواڵ ناودەوڵەتی شێعر "المربد" ک ئەڕا رێزداری وە نام شاعر فەوتیاگ "ئبراهم خەیات" ئوو وە بەشداری شاعرەێلێ لە چەنی چەن وڵات ئەنجام گریا ئوو بێ‌ژە شێعر ، بەش‌بەشێ جوور مووسیقی و سینەما و هونەرەێل کانسپچواڵ و ... دە شانێ خریانە نام‌دەسان وڵاتوەندەێلەگە.
دە کەش بەشەێلێ ک دە شار بەسرە نریا، سێ دانیشتنەوەێ شێعر خوەنین دە شارەێل "زبیر" ، " ابی الخصیب"، "قرنا" هەم دە رووژەێل چوارم نریا ئوو تا وە هەشتم نۆوامبر دنرێ.
