دەسگیرکردن جیوەجیکەرەیل تەقەلای کوشتن ئەفسەریگ لە بەغداد
شەفەق نیوز/ سەرچەوەیگ ئەمنی وەرپرس، ئمڕوو شەممە، خەوەردا لە دەسگیرکردن ژمارەیگ لە پەلامارەدەرەیل ئەفسەریگ سەربازی پایەبەرزیگ لە بەغداد وە تەقەلای کوشتتی، و دویایی دەرکەفت ک خوەی ئامانج کوشتنەگەی نەویە، بەڵکم گەورای یەکیگ لە هووزە عراقیەکان بویە.
سەرچەوەگە ئەرا ئاژانس شەفەق نیوز وت: ریگریەگە لەلایەن سێ ماشین مارکەی سیلڤادۆر بوی ک پەلامار ماشین عەمید روکنەگە دان ک هالە پۆست یاوەر وەڕێۆبەر هەواڵگری سەربازی، لە مەوقەی گلەوخواردنی لە پارێزگای واسیت، ک پەلامارەگە لە قەزای مەداین لە باشوور خوەرهەڵات بەغداد ئەنجام دریا.
وەگورەی سەرچەوەگە؛ هێزیگ ئەمنی دەورگرد شوون رووداوەگە گرد،و توێنست یەکیگ لە ماشینەیل گیر بارێد و سێ کەس لە پەلاماردەرەکان بگرێد.
سەرچەوەگە دیاری کرد ک لێکۆڵینەوە سەرەتایبەکان نشان دان ک ئەفسەرەگە خوەی ئامانج پەلامارەگە نەوی، بەڵکم یەکیگ لە شێخەیل ئێڵ شەممەر بوی، لەوەر ناکۆکیەیلیگ هوززانە.
وەرجەیە، سەرچەوەیگ ئەمنی وەرپرس، لە وەختیگ گوزەیشتە لە شەوەکی ئمڕوو شەممە، خەوەردا لە رزگاربوین ئەفسەر پایەبەرزیگ لە تەقەلای کوشتنی لە باشوور خوەرهەڵات بەغداد پایتەخت.
سەرچەوەگە ئەرا ئاژانس شەفەق نیوز وت: شەوەکی ئمڕوو، چەکدارەیلیگ نەناسریاگ تەقە وەرەو ماشینەگەی عەمید روکن (ز، ح) لە وەزارەت وەرگری لە قەزای مەداین لە باشوور خوەرهەڵات بەغداد کردن.
