بەغداد.. گەنجیگ خوەی کوشێد و دەسگیرکردن کابرایگ تواستیە ژن خوەی بکوشێد

سەرچەوەگە ئەرا ئاژانس شەفەق نیوز وت: گەنجیگ لەداڵگبوی ساڵ ٢٠٠٠ لەناو ماڵەگەی لە ناوچەی مەهدی لە دۆرە باشوور بەغداد خوەی وە سێدارە داگە و خوەی کوشتیە، وەبی زانستن هوکارەیلی.

وتیش: هیزیگ ئەمنی رەسیە شوین رویداوەگە و تەرمەگە ئەرا پزشک دادوەری بردیە، و لێکۆڵینەوە لە رویداوەگە واز کرد.

لەلاییگ ترەک، فەرماندەیی پولیس بەغداد رەسافە، لە بەیاننامەیگ رەسیە ئاژانس شەفەق نیوز وت: مەفرەزەیل پولیس کابرایگ دەسگیر کردن چەک کلاشینکۆف بیمووڵەت وەپی بویە، و دەرکەفت کە لەدویای دەمەقاڵیگ وەرد ژنەگەی، وە مۆبایل هەڕەشەی داگە، و هاتیە بکوشێدەی.

 دیاری کرد کە وەرجەیەگ بچوودە ناو ماڵ ژنەگەی وە چەکەو دەسگیر کریا، و دریا دەس بنکەی پولیس.