ترامپ هوشداری لە جەنگ جەهانی سێیەم دەێد
شەفەق نیوز/ سەرۆک ئەمریکی وەرین دۆناڵد ترامپ وت، سیاسەتیل سەرۆکەگەی ئیسە جۆ باێدن لاوازە و لیهاتگی کەمە، هەر لەوەر ئەوە بوودە مدووی هەڵسان جەنگ جەهانی سێیەم.
ترامپ لە لێدوانیگ ئەرا لایەنگرەیلی لە شار کونروی (تكساس) شەو شەممە وت: "لاوازی باێدن و لیهاتگ نەۊن رخ راسیگ دروسکەن ئەرا سەرهەڵدان جەنگ جەهانی سێیەم.
لەماوەی سەرۆکایەتی باێدن، کۆریای باکور شمارەی موشەک تەقاننەیل زیادکرد، لاوازی کۆنترۆل ئیداریەگەی ئیسە کەفتە وەرچەو وە کیشانن هێزەیل ئەمریکی لە ئەفغانستان.
ترامپ ئامۆژگاری سەرۆکەگەی ئیسە کرد، ئاگای لە دۆخ پەنابەرەیل نایاسایی بوود لەبان سنوور ئەمریکا و مەکسیک و دووپاتکرد لەبان ئەوە ک هێز سەربازی ئەرا ئەو ناوچەیلە کل بکەێد نەگ ئەرا ئەوروپا.
ترامپ وت: "وەرجە کلکردن هەر هێزیگ ئەرا مقیەتیکردن سنوورەیل خوەرئەڵات ئەوروپا بایەت سنوورەیل ئیمە لەێرە لە تەکساس مقیەتی بکردیاد". سەرۆک وەرین لە کۆتایی قسەیلی وت: " وەرجەوەگ باس لە داگیرکردن وڵاتەیلتر بکەێد، نوای داگیرکردن وڵاتەگەمان بگریمن".
