پاکستان.. چەکدارەیل تەقە لە پاسەیلیگ کەن و ٢٣ کەس کوشن
2024-08-26T07:14:24+00:00
شەفەق نیوز/ راپۆرتەیل پاکستان، ئمڕوو دووشەممە، خەوەردان لە کوشیان ٢٣ کەس لەلای کەمەو، وە پەلامار چەکدارەیل لە باشوور خوەرئاوای وڵاتەگە.
وەرپرسەیل حکومەتی لە پاکستان وتن: چەکدارەیل ٢٢ کەس خوەرئاوای وڵاتەگە کوشتن، دویای ئەوە کە ناچاریان کردن لە پاسەیل بانە خوار تا بنچینەیان بناسن، وەگورەی قسەی ئاژانس فرانس پرێس.
وەلێ ئەسۆشیتد پرس و رۆیتەرز لە زوان وەرپرسەیلیگ حکومەتی وتن: چەکدارەیل ٢٣ کەس لەو پەلامارە کوشتنە.
نەجیبولڵا کاکار وەرپرس پایەبەرز لە موسا خیل لە بلوشستان ئەرا ئاژانس فرانس پرێس وت: ٢٢ کەس لەلای کەمەو کوشیانە ٥ کەسیش زەخمدار بوینە، هەنای چەکدارەیلیگ پاسەیل ز ماشینەیل گەورە و بویچگ لەبان ری سەرەکی ناوەین بنجاب و بلوشستان وسانن.
کاکار وتیش: لەناو قوربانیەیل ١٩ کەس بنجابی و ٣ کەس بلوشی بوینە.
