فەڵەک بەد کەردی
فەڵەک بەد کەردی
هیچ شه‌رمت نه‌که‌رد؟ فه‌ڵه‌ک به‌د که‌ردی
پاێ ئه‌ده‌و، ژە حه‌د حورمه‌ت، ره‌د که‌ردی
به‌د، وە گه‌رد ئاڵ موحه‌مه‌د که‌ردی
ئه‌وسا شین، ژە ده‌شتِ که‌ربه‌لا خێزان
په‌ێ چێش ئه‌وراقت، ژه هه‌م نه‌ڕێزان؟!
په‌ێ چێش ده‌ستِ حه‌ق، شه‌مشێر نه‌کێشا
ژە بێخ، بنچینه‌ێ به‌دان نه‌تێشا
په‌ێ چێش ئه‌و وه‌خته، روێ نشوور نه‌وی
په‌ێ چێش دیده‌ێ مانگ و خوەرشید کوور نه‌وی
په‌ێ چێش جبره‌ئیل، په‌ڕ نه‌ڕێزاوه
سوورِ ئێسرافیل، سه‌خت نه‌خێزاوه
په‌ێ چێش عزرائیل، گیانِ وێش نه‌سه‌ن
په‌ێ چێش میکائیل، مونفه‌عێل نه‌مه‌ن
ماچان خه‌ێمه‌گاێ حوسه‌ێن پاره بی
عێاڵِ عتره‌تِ ئه‌و ئاواره بی
خه‌ڵتان خوێن بی، شاێ تشنه‌کامان
فه‌ڵه‌ک ژە جه‌ورت، ئامان سه‌د ئامان
عابد بیمار بی به‌و زه‌نجیره دا
بی وه سه‌ر قه‌تار ئه‌و ئه‌سیره دا
یا ره‌ب یه مه‌زهه‌ر لایه‌زالیت بی؟
نشانه‌ی شه‌وکه‌ت زۆلجه‌لالیت بی؟
یا رەب یه گووشوار عه‌رش به‌رین بی؟
په‌روه‌رده‌ێ باڵووش ڕووحۆلئه‌مین بی؟
ئی ره‌نجه لازم ئه‌حواڵش نه‌وی
ئی زۆڵمه لایق جه‌ڵاڵش نه‌وی
نه‌عش تیرواران، بێ سه‌ر مه‌نه‌ش روو
ئه‌سیران شام حاڵ په‌رگه‌نه‌ش روو
ناڵه‌ێ خه‌ریوان شار شامش روو
شه‌هیدی یاران، تشنه‌کامش روو
فه‌ڵه‌ک، ئێ زوڵمه هیچ ره‌وا نه‌وی
سزاوار ئاڵِ موسته‌فا نه‌وی
ئه‌ر باچم یا ره‌ب، رەزاێ تۆ نه‌وی
ئی کاره لاێقِ ده‌رگاێ تۆ نه‌وی
ته‌رسم رانده‌ێ باب ڕه‌حمه‌تم که‌ری
ژە نوو سزاوار زه‌حمه‌تم که‌ری
"حه‌قه" ژە‌ێ شه‌رحه زوانت لاڵ بوو
دیده‌ت وه ڕه‌حمه‌ت شاێ لایه‌زاڵ بوو
به‌ڵکەم وه حورمه‌ت حوسه‌ێن سه‌روه‌ر
فارغ بین ژە شه‌ڕ شه‌راره‌ێ مه‌حشه‌ر
---
ملاحەقەلی سیاپووش (فه‌یلی)
ملاحەقەلی سیاپووش ک وە نازناو (حەقە) و نام نازاری (فەیلی) شێعرەێلەێ وتگە، شاعر کوردی‌بێژێ بییە ک وە بنزار کوردی گوران شێعر ئەڵوەسییە.
ئەوی لە هووز سیاپووش ئەڵەشتەر بییە دە ناوچەێ لەکستان ک ها لاژۆر ئوستان لوڕستان و یەکێگە لە عارفەێل و شاعرەێل نامدار کورد ک دە سەدەێ سێزدەێ کووچی هەتاوی ژیاگە.
دیوانە شێعرەگەێ، بیس ساڵ پێش وە تێ‌کوشان (عەڤدسەعید حەقیقی موقەدەم) کووەو بییە.
ئەوی شێعرەێلە وە دەسەێ‌بنزار (گوران، لەکی، ئەوڕامی) وتگە و دە گشت بوارێ شێعر دیرێ دوفێشتر دە نزانامە (نقانامە/ موناجات‌نامە) ک یەک لە دیاری‌ترین شێعرەێلەێ هنێگە ک لە داخ عاشوورا وتگەسەێ .
