شەماڵ
شەماڵ ساتێ بووس شەماڵ ساتێ بووس
شەماڵ قەسەمد دەم وە دیدەێ دووس
شەماڵ قەسەمد وه دیدەێ دووسم
تەنیاێ گیانم سەن تا وه کەێ بووسم
شماڵ قەسەمد وەدار وەنێ
وەترنگەێ کیەنی ناو تاش و کەنێ
وە کەپوو تەنیاێ بێ پا وە دەسێ
یا وە ڕێوار داێم بێ کەسێ
وە داڵ پیر باڵەیڵ شکیایێ
یا دار پیر وەلنگەێل ڕزیایێ
وە وەڵنگ وشک پاێ داڕ وەنێ
یا چۊزەێ نەوڕەس قۊلی دەروەنێ
وە سەونزی بەڕۊن رەێنی کەێ کوو
یا وە نازاری رەوز هشکەچوو
وه تلۊق خوەر وە سەێنی خەو
وە ناز خەیاڵ شکیاێ لە ناو چەو
وە زەردی چەوێر وە بڵێنی وەن
وە تێژی بژانگ وە پێچ سەروەن
وە بوو عەتر نان لە ساج و کوانێ
یا بوو بان ئەنوود له بان خانێ
وە ناز چەو مەس وه ڕەێنی شەو
وە عشوه وە شەوق نازاران له خەو
وە بەڕزی مانشت وە چاڵی ئەێوان
وە دار سزێای بان سەرێوان
شەماڵ قەسەمد دەم وە سەردەوا
وە هشکی چاڵاو وه چروو تەنیا
وە پیری ئەڕجن وە سەڕدی زەلان
وە ژان تەنیاێ وە زیڕەێ مەلان
وە هشکی پۊش و وه زردی ئەسپەن
وە تەنیاێ دار بێ کەس سەرشەن
وە تێەریکی شەو وە هسارەێ سوو
وە ڕوژنای ڕووژ وەتەنیاێ کەپوو
وە کۊەو وە دەێشت وە باخ و وە دار
وه ئاخڵەێ مانگ لە دەێشتەێ شەوار
شەماڵ قەسەمد وە نەرمە واران
وەه چک چک ئاو له زۆڵف داران
وە سەردی سووان وە دڵ تەنگی ئەور
وە کۊەی مانشت کتاو دەورەی گەور
وە بووسان وشک وه تەنیای چەرداخ
وەشەوق شەوار لە دەێشتەی ئێڵاخ
وەو دار بەڕز ناو دویرانه
یا وەو ئەنجیر باخ خورانه
یا وەو بڵالۊک بان بانکوڵه
یا وەو سیەمال ناو دەێشتەێ چووڵه
یا وەگۊج هشک یەێ پەل دارێ
یا وە خەت و خاڵ سەونزەێ نازارێ
شەماڵ قەسەمد وە داران دەێشت
ت بۊش وه دووسم تەنیای ڵەلیم نەێشت
تەنیاێ داڕزان پووس و سقانم
داێە قەپاڵا ته مام گیانم
له وێنەێ داوڵ مردم وە پاۆه
شەماڵ بۊش زڵفێ بخەێ وه لاۆه
بۊش ساتێ بووسێ لەولاێ دەۆاره
بوده مانگەشەو له ئێ شەۆاره
"جەڵاڵ کووهی "
