شیشە واران
2021-08-31T13:02:27+00:00
شیعر/ کەنعان موڕاد
شیشە واران
دەنگ شیشەی رەنگاوڕەگ
پەنجەرەی شکیاگ پڕ لە یاد
هەڵم مۆسیقا لەلیان بەرزەو بوود
کەفێدە بان ری ئاوارەیل پاپەتی
ئەوانەگ میەنەی دەنگ چکەی ئاویگ کەن
تینی میلکان و سایک چەتر بووسانن
ئی دەنگ بەرز زەخمەیلە
وەگەرد گامەیل بیخودی
سەنتوور مووریان ژەنێد
و تەمەی خاک چووڵ و دویریان
نووسێدە بان دڵ بیسەوادەیل
وەرەو کام بیئاسوودەیی ؟
وەرەو کام ئومید گومابوی!
و ئەرا کام گووش ئی دەنگ ناڵەی زەڵاڵە
پەنا وە ژنەفتن بوەێد!
بیگانە لە ناو خاک خوەم
و خاکیش بیگانەی ناو دڵمە.
