بێ داڵکی
خودا حاڵێ بەهێشتایەێ
م هە خوەم چۆ خودا دایەێ
دانیشتم ئەڵ ژێر سایەێ
م دێ چەم بی؟ و دێ چەم کم بی ؟
خودا باوک و براڵەم بی
داڵکم نۆر هاڵە بی
پەلنگ و سۆن ماڵە بی
هەناس کول عێاڵە بی
ڤەرم باوک و براڵە بی
ڤە داخەو چی مەنێم تەنێا
کِڕێ داوود ڤە دەورت «دا»
تو چین و خوەشی ئەژ دڵ چی
ڤە گەرد تو، ژێر گڵ چی
خەم و ڕەنجِ بێ حاسڵ چی
شەو و ڕوژم ڤە باتڵ چی
دڵم ئەژ دەور و گژ خۆنە
خوەشاڵە خوەت دا ک چینە
دا م دەرمەنمە بێ تو
دێلڕو جەنمە بێ تو
ڤەرچە م مەنمە بێ تو
خۆن بوو ئەر خەنمە بێ تو
ئاخمە داخمە ڤەرت
قورس و کاخمە ڤەرت
تو چیۆن و مەنێمن تەنێا
تو هە خوەت فک بیۆن ئەژ دنێا
م کووس بێ کەسیم ژەنێا
خەنە ئەڵ ڕی لێوەم گەنێا
ئاخم ڤەر داڵکەێ پیرم
تا هەسەم نەێچی ئەژ ڤیرم
ئێمە ئەژ ێەک خەڤەر نەێریم
ڕیێِ خووێ دەڤەر نەێریم
خوەێشک و برانگی هەر نەێریم
ڤەر تەنگی هەدەر نەێریم
ڤتم بزونی داڵکە
ئەێچە سەێمن چەن ساڵێکە
بێ خەوەر ئەژ یەکیم ئێمدا
هەر یەکێ هەێمنە یێ جا
خوەشاڵ ڤەر زیتری دا
تەرف تۆن بیمنە یێ لا
ئیلام و دێلڕو پەڵە
ڕووژگارمو گەن تەڵە
نزیک ئەما دیرێم ئەژ یەک
سەرد و سڕ بئ فیرێم ئەژ یەک
گێ گێ گلەێ دیرێم ئەژ یەک
هێ خوەش بووەن چیریم ئەژ یەک
خودا هەل ، ڕاستو نارێ
هەنە هەر شوون و دیارێ
دەڕمێ ماڵ بێ داڵگ
ئەڵکەفی ساڵ بێ داڵگ
نەوین ئەژ حاڵ بێ داڵگ
دڵم زخاڵە بێ داڵگ
خودا مەر خوەێ سەورێ بەێ وەێ
بکومێ ئەڵ حاڵ لێوەێ
چەو ڤە ڕیێ دعاتیمن
بەنەێ خوەت و خوداتیمن
دەرمەنەێ بی پەناتیمن
مەنێمە ئەڵ هەواتیمن
جوورِ زیتر جەممو کە
دعا ڤەرِ هەمەمو کە
یارمحمەد عەبدی
وشەنامە:
بەهێشتایەێ : بتهیشتا// دەڕمێ: داڕمێ ، داڕوخێ// ئەڵکەفی: دەرکەوتن ، تەڵەف ، شوێن گوم//سەور: تاقەت ، قەرار//بکومێ:بسازێ //ڤەرم:ئەڕام، بۆم//دەور و گژ : خزم و قەوم//نەێچی ، ناچی//ڤیرم:بیرم//دا:داڵگ//دەرمەنە: ناتەوان//ئیلام ،پاڵە ، دێلڕو: سێ شار لە نیشتمان بنەماڵەێ شاعیر// پەلنگ :لەنگەر رەشماڵ // گەنێا : خراوبوون //ڤەرچە :ئەڕا چە ، بۆچی //خەنمە:خەنستن، پێکەنین //دەڤەر :لەبەر// نەیرێم : نیمانە//تەرف تۆن: پەخش و پڵا //تەڵە : تێەڵ، تاڵ //دیر:دۆیر، دوور //بی فێر:بێ هەواڵ ، بێ خەوەر//گێ گێ :جارجارێک //چیرێم ئەژ یەک : چەمانە لە یەک ، داوامان نیە لە یەک //هەل : چەفت، چەوت.
