راپۆرتیگ لە بانک ناودەوڵەتی باس پیسبۊن وا لە خوەرهەڵات ناوڕاس کەێد
شەفەق نیوز/ بانک ناودەوڵەتی لە راپۆرتیگ باس ئەوە کەێد ک پیسبۊن وا نزیکەی ١٤١ ملیار دۆلار لە ساڵیگ خەێدە گەردن ناوچەی خوەرئەڵات ناوڕاس و باکور ئەفریقا، و داوا لە دەوڵەتەیل ناوچەگە کرد ئابووریان زیاتر بکەنە سەوز.
راپۆرتەگە ک ئاژانس شەفەق نیوز چەودێریی کرد وت: خەرج پیسبۊن واگە وەگەرد پیسبۊن دەریا و کناراوەیل وە زیاتر لە ٣% لە گشت بەرهەم ناوخۆیی مەزەنە کریەێد، لە بەشیگ لە وڵاتەیل ناوچەگە جۊر میسر و لوبنان و یەمەن.
وتیش: ئاست پیسبۊن لە شارە گەورەیلەی ناوچەگە هاناو بەرزترین ئاستەیل جەهان.
ئەو راپۆرتە ک وەناونشان ئاسمان پاک و دەریای رووشن بۊ، وت: ئەگەر مەردمەگە دۊای بیماری خوەیان و کەسەیل خیزانیان لەوەر پیسبۊن وا لەکار کەفن و بەرهەم کەمەو بوود، و خەرج پزشکی ئەرا چارەسەرییان زوور فرەیگ خەێدە بان کەسەیل و حکومەتەیل.
وەگورەی راپۆرتەگە، ئەوەسا هەر کەسیگ لەناوچەگە ٦٠ رووژ بیمار بوود لە ژیانی لەوەر پیسبۊن وا و خەڵک ناوچەیل شارستانی ١٠ جار زیاتر لە ئاست پیسبۊن وا هەناس کیشن.
بانکەگە وتیش: دەریای چەرمگ ناوڕاس لەناو پیسترین دەریایل جەهانە وە پلاستیک، و دیاری کرد ک هەر کەسیگ لەناوچەگە ساڵیگ شەش کێلوگرام زواڵە خەێدە دەریا.
