کۆمەڵگای کوردستانی باوەڕ وە ناکۆکی کورد و عەرەو نەیرێد
د. سامان سۆرانی/ وەداخەو ک وەرجە چەن رووژیگ کردەوەی چەن کەسیگ لە خراوەکارەگان و ئاژاوەکارەگان دیمن، لە پەلامارداین ژمارەیگ لەو گەشتیارەیلە ک لە بەغداد و پارێزگایل عراق هاتنە، ک ئەرا گوزرانکردن پشۆی سەر ساڵ سەردان کوردستان کردنە.
بی گومان، ک ئی رەفتارەیلە لە کەلتوور و رەوشت کۆمەڵگای کوردستانی نین، ک گەل کوردستان و حکومەتی لە ساڵەیل گوزەیشتە خاسترین نموونە ئەرا جهان نشان دان، لە پێشوازیکردن مەلیۆنه‌ها ئاوارەی پارێزگایل عراق و دەوڵەتەیل هاوسا، و وەیجوورە خاک کوردستان ئەرایان بویە پەنای ئارامیگ، و هەر دەروازەیل هەرێم هەمیشە لەنوایان و لەنوای گەشتیار و سەردانەیل واز مینن.
هەرکەس ماڵپەڕەیل مێژوو بزووتنەوەی کوردستانی بەێدەو، ئەوەسا دوێنیدەی پڕە لە هەڵوێستەیل فرەیگ ک بانگوازە ئەرا برایەتی لەناونی گەلەیل عەرەو و کورد.
لە ساڵ ١٩٤٣ ، سەرکردەی نەمر موستەفا بارزاني، بەیاننامەیگ وەناو شۆڕش کوردستانی ئەو وەختە دەرکرد، و وت: ئیمە جەنگ دژ وە گەل عراقی و عەرەوی نێکەیمن، بەڵکم وەرخودان هەڵمەتەیل هێزە سەربازیەگان و پۆلیسیەگان بەریتانیا و عراق کەیمن، و ئەیە بەڵگەیگە لەوە ک کۆمەڵگای کوردستانی و سەرکردە داناگەی دویرەوکەفن لە ململانەی عه‌رەو و کورد و هەمیشە هانە گەرد برایەتی و پشتگردن و رەسینەوە و پەیوەندی کەلتووری و کۆمەڵایەتی.
تا ئمڕوو سەرکردەی کوردستانی مقەیەتی لەی بۆچوونە کردگە، هەرچەن شۆڤینیەگان و چەوتەنگەگان لە عەرەو و ئەواکان، هەمیشە تەقەلای دروسکردن ململانە و فیتنە و تاوانەوەی کورد دانه، و هان حکومەتە توند و شۆڤینەیلیان دیان لە وەردەوامبوین جەنگ و شکەنجە و بارکردن و کۆمەڵەکوشتن دژ وە گەل ئاشتی خواز کوردستان.
وهەمیش دەرکردن بەیاننامەیگ لە 3/1/2021 لە شەرمەزارکردن رووادوەیل پەلامارەگان دژ وە گەشتیارەگان لەلایەن مەسرور بارزانی سەرۆک حکومەت هەرێم کوردستان، و هەڕەشەی سەختترین ریکارەگان لەبان هەرکەسیگ تەقەلای شیوانن کەلتور باڵای کۆمەڵگای کوردستانی بیەێد، هەمیش بەڵکەیگ ترە لە باوەڕی سەرکردەی کوردستانی لە گرنگی مقەیەتیکردن کەشوهەوایل پێکەوەژیان و ئازادی.
حکومەت هەرێم کوردستان پابەنە وە دەستور و بنەمایل و رەوشەیل گەورایگ لە مێژوو و پەیوەندیەگان ناونی گەلەگان، و رەنجەیل فرەیگ دەێد تا نموونەی خاسیگ لە رەفتار دیموکراتی و زەمینەسازی ئەرا سەرکەفتن لەبان مەغز دویرەوخستن و خوسە کەێد.
روی دانایی و وەرپرسایەتی هیلێدەمان هەمیشە لەبنەمای رێسگایل کار دیموکراتی و پێکەوەژیان بکەیمن، و بیناکردن پەیوەندیەیلیگ دیموکراتی لەناونی گشت هێزە کۆمەڵیەگان و خاسەوکردن هاوکاری و قویلەوکردنی لەجیای ئاژاوە و ناکۆکیەگان، و رێزگردن لە دامەزراوە دەستووریەگان و سەروەری یاسای ئازادیەگان و مافەیل هاووڵاتی، وهەمیش بایەدە ری نەیەمن وە دەرچگن هەست دویرەوکەفتن لە ناو رزەیل هیچ پێکاتیگ عراقی.
لە کۆتایی، دی ئی ململانەیلە لە عراق و ناوچەگە بەسە، بیلا ناوچەگە بوودە باخچەیگ ئەرا ئاشتی و خوەشگوزرانی،و پێشکەفتن ئەرا گشتی، و با مینەی چارەسەریەیلیگ سیاسی ئاشتەوایی ئەرا گرفتەیلمان بکەێمن، ك دویرە لە توندڕەوەی و مەزهەبی لە کار سیاسی.
