وە سیوڵە یا وە تیوڵە؟
کەنعان موڕاد/ لە وەختیگ ک هیمان هویر دویاکەفتگ لەناو ئی وڵاتە، وڵاتەگە بەێدە دویا، ئەرا سەدان ساڵ گوزەشتە، لە خوسەهاتن و کینە ودڵسەختی، رەفتار نوویگ نشان ئەو دویاکەفتن ناشرینە دەێد، ئەوەیش وەگەرد کابرایگ بیوەی، لە برا یارسانیەیل، ک کەفتە وەر هویر دویاکەفتگ، لەلایەن چەن کەسیگ، وەناو حەشد شەعبی کار کەن، لە پارێزگای کەرکوک.
ئیمەی کورد فەیلی، هەنای چینمە پرسەی کەسیگ، و خوازیمن سەرەخوەشی لە بنەماڵەی مردگ بکەیمن، وەپی ئویشیمن: (چەو خەیری وەپیدان بوود)، ک هویچ نەتەوەیگ لەی دەورگردە وەی ووشەیلە سەرەخوەشی لە کەسیگ نیەکەێد، و ئەو شیوەزارەیل کوردیش وەیجویرە نیەوشن، ک ئایا ئیمە ئی رستە لەکوو هاوردیمن؟.
ئی رستە (چەو خەیری وەپیدان بوود) واتە چەو خەیر مردیەگە، وەزینیەیل بوود، واتە باوەڕ دیریمن ک گیان مردگ توانایگ دیرێد، و چەوی مقەیەتی کەسوکارەیلی کەێد، وخەیریگ ئەرایان دروس کەێد.
ئی هویر وباوەڕە، لەوە هاتیە ک گشتمان یارسانی بویمنە، و هیمان ئەو باوەڕە لەلامان کاڵەو نەویە.
هاتێ ئەو دڵسووزیە هیلێد ئی باوەتە وە ناخ دڵیگ باس بکەم، ک پێشمەرگەیگ کاکەیی، لەلاین چەن کەسیگ وەناو حەشد شەعبی لە کەرکوک، سیوڵی تاشیا.
(ئەیمەن عەبدین کاکەیی) خەڵک گەڕەک ئەسرا و مەفقودین لە شار کەرکوک، و پێشمەرگەی لیوای 9ی پیادەی وەزارەت پێشمەرگە، و لە خود وەختەگە لە سنوور ئامرلی وەگەرد خاوەن کاریگ کار کەێد، دویای قسە و مرافەیگ وەگەرد چەن کریکاریگ لەناو کارەگە، ک ئەوان لە حەشد شەعبی بوین، و سووکایەتی وە پێشمەرگە کردنە، تا مرافەگە رەسیەسە ئەوە ک ئەوان پەیوەندی وە هیزیگ حەشد شەعبی کردنە، وهیزەگە هاتیە ودەس لە کابرای کاکەیی وەشاننە، وقەیریگ قسەی بەد و ناونەسەق وەپی وتنە، و واز لەلی ناوردنە، تا سەر و سیوڵی تاشین.
ئایا ئی کردەوە چە وەپیمان نشان دەێد؟
و چەن هەزار ساڵتر خوازیمن، تا کۆمەڵگا یەک بنگز وەرەو نوا بچوود؟.
