ئەنووەیل داڵگی
ئەنووەیل داڵگی
شەو خڕە لێ هاتۊگ.. ئاسمان ئەسرەیلێ ڕێیا گرتۊگ و زمسان کفن کردۊگ لە وەر ول٘ات لە بن، یەی کەیوانووێ تازە هاوردۊنەێ ئڕا لامان ،هناس سەردێ لە بن سینگەو هاورد و ئاخێگ لە مۊلەق پەشێوی یەی ژیان لە هۊر چگ کیشاو وت ک چەنێ ئێ شەوەیلە ئەڕام خەریون...
نیەزانم.. جارێ فرە سەینۊ!
ئەنووێ منال٘انە لێو و پێڵگەیلێ هاوردۊگە لەرزە!! کەمێ چگمە بەیرەیەو بەنج زووان وەلێ ئەل٘چپانم و نم ناز نیشتە نەقڵ کردن ئەڕام..
وت ک:
وەختێ ڕیچەرمگەم لە شەوێ تیەریک جوور ئمشەو خەریو و ورسگ گیان کەنی مناڵەیلە ک هێمان ئەڵهەیەی باوگێیان هشکەو نەۊگ دو ئوتاق شڕە فرەتن و بەشێ کردن و حازر نەۊن تا هەی فرە نە، دو شەو، م° بووەنە لای خوەیان..
یەۊە ک هاوردنەم خسنەمەی سۊک سال٘مەنەیلەو ئێمەیش وەی سەرانەی پیرییە لە هانای بێدەنگ ئاوەختەیل° ژیانم دیواخان‌داری کەم...!
کوڵ و کوڵوڕ قەیرێ لەی قسیەیلە ئەڕام کرد ،باوەڕ کەن چنەو چۊمە بەیر قسیەیلێیەو و بەزەیم وە حالێ هات و دل٘م ئەڕای سزیا ،خوەم لە هۊر خوەم چۊم! ک° ژان° خوەم لە یەی کەمتر نییە!!!
دکوت شەوارۊ وەختۊ لە هۊرم بچووگ ! ئەل٘سام هاتم زەنگێ دام..
یەێ جار... دو جار... سێ جار... جواو نێیا ،لە خەوۊ....!
لەنوو گرتمەی... ئاخرێ جواو دا...!دیم سۊەرەو بۊگ و وە تیەڵەو وت:
کییە؟؟
منیش وە نەوەدڵەو جواو دام: سڵام ڕووڵە منم داڵگد...
باوەڕ کەن تا دەنگ م° چگە گووشێیا چۊ بم تیەڵ تووقییا ڕۊما و سۊەرەو لیمەو بۊ و وت: هەم چەدە؟ وەی سات چوار شەویشە ژیان وە پیمان نیەید؟! دی دەس لە قەومانەو بکە!
ئاااخ.. نیەزانین! چمان وە ئاو یەخ سناوم دان! کەفتمەو هۊر قسیەیلەی کەیوانووە...
وتم: ڕووڵە بیس و چەن ساڵ پێش هەی مەوقەی شەوە ت° م° لە خەو ئەڵسانی...!
کارێ نێیاشتم ،فەقەت تواسم بۊشم... ڕووڵە وە دی هاتنت بمارگ!.
رو ح الله حیدربیگی (ژوان)
