رووژ جەهانی خەر؟ یا رووژ سرۆشت
شەفەق نیوز- هەر چەن ک رووژ سێزدە وە دەر، ئێسە وە نام رووژ سرۆشت نامگیرەو بییە تا وڵاتوەندەێلە هووشێیان وە دەر و دەێشت و کێو و دار و ئاو و هەرچێ چشت سرۆشتییە ببن باوجی بان پەنجا و شەش، هەفت ساڵ پێش ( 1963 _ 1971 ز) دە کرماشان ئوو ئەڕا چوار ساڵ، بڕێ لە رووشنبیرەێلە بنەڕای حزبێ نان وە نام (حزب خەران) و رووژ سێزدە وە دەریش وە نام (رووژ جەهانی خەر) نامگیرەو کردن.
رووژنامەی هەنەکچی تەوفیق، لەێ کار ئی حزبە ئوڵگوو گرت و پەروەردەێ ئی ئیدە کردە و بەردەوامی و سەقامێ دا وەێ کارە.
عومران سەڵاحی، هەنەکی‌نویس ئێرانی دەبارەێ حزب خران وتگە: "دە رووژنامه تەوفیق حزبێگ وە نام حزب خەران نریا که ئورگانێ ئەڕا خەرەێلە داشت ئوو منیش وە جاتی سەردەبیر، بیمە خەردەبیرێ"
پیاگەێلێ ک ئەندام ئی حزبە بینە لانامێیان "نێرەخەر" وە جی "ئاغا/ کاک" ئوو ژنەێلەێ ئەندام ئی حزبەیش لانامێیان "ماچەخەر" وە جالی "خانم/ خاتوو/ خوشکە" بییە.
ئی کارەێلە وە خاتر دەمپاچگانی وە قەشمەرجاڕ کردن کار سیاسی و حزبایەتی دە ئێران ئەوسا ک وە ئبتزاڵ کیشریابی، وە دەس بڕێ قەشمەر و تیتاڵ‌چی کرماشانی، کریاگە.
نیشان ئی حزب سەرکەپووڵگ خەرێ بییە ک یە‌کجوورەێلێ وە وێنەێ نیشان حزب دموکرات ئامریکا هەم هەسە.
خەر، یەکێ لە نیشانەێل حزب دموکرات ئامریکاسە. ئەندرو جەکسون، یەکم سەرۆک کومار دموکرات ئامریکا بییە ک هماڵەێلەێ ئەڕا ریشخەنی کردن وەێ لانامێ نان وە (جەک ئس) یا (خەر) ک وە جی بەد هاتن، خوەێ و حزبەگەێ خوەشێیان هات وەێ لانامە و یە خوەێ بی وە چین خەیرێ ئەڕایان و لە وەو دوما بی ک سەرگ خەر کریا وە یەکێ لە نیشانەێلەێ ئی حزب گەپ ئامریکاییە.
دە سڵێمانییەێ کوردستانیش حزبێ لەێ‌وا ئوو وەێ نامەوە نریاگە.
