راپۆرتیگ: وای پیس لە جگارە ومەی و تیرۆر مەرگبارترە
شەفەق نیوز/ راپۆرت نوویگ لەلایەن پەیمانگای سیاسەت وزە لە زانکۆی شیکاگۆ، هوشداری لە هەڵمژان وای پیس کرد، وت: مەزەنەی تەمەن جەهانی وەزیاتر لە دوو ساڵ کەمەو کەێد، ک لە جگارەکیشان ومەی نووشین وجەنگ و تیرۆر فرەتر رخ لەبان ژیان دیرێد.
رووژنامەی واشینتۆن پۆست بەشیگ لەو راپۆرتە بڵاو کرد ک وەناو نشانەی خاسی وا دەرچگ. راپۆرتەگە باس ئەوە کرد ک پیسبوین وا وە بەشەیل دویکەڵ وهەڵم و تووز هەر وە فرەیی مەن، ئەوە وەگەرد بڵاوبوین ڤایرۆس کۆرۆنا ک بایەت بوی ئاسمانەگە لە چەن شوین پیسیگ پە جەهان پاکەو بکەێد.
لە خود وەختەگە، نشانەی خاسی وا ئویشێد: بەڵگەیل مەترسی تەندروسی ک وە پیسی وا زیایەو بوی، وتیش: سەرکردەیل جەهان تەقەلای خاسیگ ئەرا چارەکردن ئی گیچەڵە نیەن.
جگارەکیشان ناوڕاس مەزەنەی تەمەن ئەرا نزیکەی ١،٩ ساڵ کەمەو کەێد، ومەی نووشین هەشت مانگ تەمەن کەمەو کەێد، باوجی پیسی وا ئەرا ٢،٢ ساڵ تەمەن کەمەو کەێد.
وەگورەی نشانەی خاسی وا، ئاو و ئاوەڕۆ ناگونجیاگ ئەرا ماوەی هەفت مانگ تەمەن کوڵەو کەێد، و جەنگ و تیرۆر تەمەن جەهانی ئەرا تەنیا نۆ رووژ کەمەو کەێد.
هەرچەن کەسیگ توانێد خوەی لە جگارە و مەی دویر بخەێد، باوجی وەهویچ شیوەیگ دویرەوکەفتن لە پیسی وا نییە. وەگورەی راپۆرتەگە، نزیکەی ٩٧ لەسەد لە دانیشتگەیل جەهان، هانە شوینەیلیگ ئاست پیسی وا لە سنوور تەمەی رەد کەێد.
راپۆرتەگە دیاری کرد ک، باشوور ئاسیا زیاترین ناوچەس لە پیسی وا لە جەهان، وهەڵمژان وا زیاتر بکوشە، و ئەوەیش وەگەرد گەشەی ناوچەگە وزیایبوین شمارەی دانیشتگەیل تیەێد.
بەنگلادیش، پیسترین دەوڵەتە، ونزیکەی ٤٤ لەسەد لە پیسی جەهان لە ساڵ ٢٠١٣ لە وڵات هیند هاتیە.
