خوداناس و مسگەر
کوڵە چیرووک
خوداناس و مسگەر بەش ۱
خوداناسیگ ۴۰ شەوانەڕووژ، "چلە" گردۊد تا خودا، زیارەت بکەێد!
گشتێ ڕووژەگان وە ڕووژێ بۊ و هەر خەریک "ئێعتکاف" و لە خەڵک دۊرگردن
ڕووژ وە ڕووژێ و شەو وە هەڵسان و شەونەخەفی و گری و زاری لە دەرگای خودا!
ڕووژ سی و شەشم، دەنگەیگ هاتە گووشێ ک وەت : سات ۶ نیمەرووەودۊا ، لە بازار مسگەرەیل، لە دکان فڵانە مسگەر، بچوو تا خودا زیارەت بکەید!
خوداناس لە سات پەنجەو، هاتە بازار مسگەرەیل و لە مینەێ یاروو دکان، هەر گەردیاد و خڕ خواردیاد...
ئۊشێد : کەێوانوو پیرێگ دیم ک تیانچەی مسینێگ وە دەسێیەو بۊ و دکان وە دکان گەردیاد و نیشان مسگەرەگان دیادەێ، چمان تواسیاد بفرووشێدەێ.
وە هەر مسگەرێگ نیشانێ دیا، ئەوانیش کیشیانەێ و وەتیانە پێ : چوار قرووش و بیس شای
کەێوانوویش وەتیا : نیەود بسێنیدەێ شەش قرووش؟
مسگەرەگانیش وەتێان : نرخێ هەر یەسە و زیاتر لە یە، ئەڕامان نەێرێد.
کەێوانوویش دجارە تیانچە نیادەو بان سەر و گل خواردیادە ناو مسگەرەگانا و ئەوانیش هەر ئێ نرخە وە پێ وەتیان!
تا یەگ دۊاخر ڕەسیە ئەو دکانە گ بڕیارۊ منیش بچمە ئەورە...
خوداناس و مسگەر بەش ۲
مسگەر سەرگەرم کار خوەێ بۊ ک کەێوانوو وەتە پێ :
ئێ تیانچە، فرووشییە و دەمەێ شەش قورووش، سێنیدەێ؟
مسگەر پرسی : ئەڕا شەش قورووش؟
کەێوانوو سفرەێ دڵێ لە لای مسگەر خسەو و وەت : کوڕ نەخوەشێگ دێرم، دکتر نخسەێگ ئەڕاێ نۊساس ک پۊلەگەێ کەێدە شەش قورووش!
مسگەر تیانچە گردە دەسەو، نووڕسە پێ و وەت ئێ تیانچە ئازا و ئەنتیکەس و حەێفە بفرووشیدەێ، ئەمان ئەر فرە دی گیرید و تواید بفرووشیدەێ، م سێنمەێ ۲۵ قورووش!!
کەێوانوو وەت : تۊلەکی وە پیم کەێد؟!
مسگەر وەت : نە، تیانچە لە کەێوانوو سەن و ۲۵ قورووش دا کەێوانوو!!
کەێوانوو ک سەرێ سڕ مەنۊد، لە حاڵێ ک لەپسا نزاێ خەێر مسگەڕ کردیا، دەو دەوان هات وەرەو ماڵ!
م ک تماشاچی ئێ ماجرا بۊم و ساتەوەخت دیدار لە هۊرمەو چۊد، پەڕیمەو ناو دکان مسگەرەو و وەتمە پێ :
ت چمان سەرد لە مامڵە و کاسبی نیەود !!!
مسگەرەیل تر وەتیان ئێ تیانچە زیاتر لە ۴ قورووش و ۲۰ شای، نیەکەێد، ئمجا ت سینیدەێ ۲۵ قورووش؟!!
مسگەر پیر وەت : م تیانچە نەسەنم!!
م پۊل دام، نخسەێ مناڵەگەێ بسێنێد، پۊل دام ک یەک هەفتە مناڵەگەێ هێمات بکەێد، پۊل دام تا ئەودۊاێ هاجەت و کەلوپەل ماڵەگەێ نەفرووشێد، م تیانچە نەسەنم...
م لە قسەێگ ک کردۊم فرەی فرە شەرمەسارەو بۊم و چێمە ناو فکرەو ک دەنگەێگ وە دەنگ بەرز وەت :
وە چلەگردن و عێبادەت‌کردن کەسێ وە زیارەت ئیمە نیەتێدن، ئەر کەفتێیێگ لە زەۊ هێز بێیەید، ئیمە خوەمان تیەیمنە دیدارد!
هەڵگەردان و نۊسان.. ژیوا
