باوگە هایدە کوو؟
شەفەق نیوز/ نویسەریگ شانۆگەری ئوردنی، وەناو ئەحمەد حەسەن زەعبی، دادیگ لەدەس مەیل سەرد مناڵەیلی ئەرای کەێد، وەرانوەر مەیل گەرمیان وەگەرد داڵگیان، ک لە وتاریگ ئاژانس شەفەق نیوز ئەڵگەردانی کرد ئویشێد:
هەنای مناڵەیلم لە مەکتەو گلەو خودن، روی وەرەو دەس چەپ کەن، وە مینەی داڵگیان لەناو ئاشخانەگە، هەرچەن نویسینگەی من چەن گامیگ لە ئاشخانەگە دویرە.
پاپەی ئی پشتگووشخستنە نیەوم، جاردباریش دەنگ داڵگیان ژنەفم ک وەپیان ئویشێد:
بچن سڵام باوگدان بیەن.. بچن
لە ئی داوای داڵگیانە، تا جیوەجیکردنی لەلای مناڵەیل، نزیک چارەکیگ یا نیم ساعەت کیشێد.
هەمیش فرە هویریگ لەی پشتگووشخستنە نیەکەم.
شایەت ریوبانەگە سەختە، و لە ئاشخانەگە تا نویسینگەی من ریەگە پڕە لە مەردم، و هاتێ وەخت فرەیگ بخوازن تا وەلای من بڕەسن.
ئاخرێ، یەکە یەکە رەسنە لای ئی باوگە، و سەڵام سەردیگ لەلیم کەن، و چنە ری.
ئەو هەفتە، وەگەرد گلەوخواردن کوڕە گەورەگەم، لە نویسینگە دەرچگم، و دیمەی خوازێد چشتیگ پیشکەش وە داڵگی بکەێد، وهەنای نووڕێد ک من رەد بویم، دەسەیلی خستە پشتی، ومنیش خوەم کردمە نەزان، و رەد بویم.
هەناێ جاریگتر گلەو خواردم، نووڕیم ک یەک شیرینی گرانبەهایگ نەێدە دەم داڵگی، وهەناێ چەوی کەفتەلیم، شەرمی هات لەپڕک چگ و نەزانست چە بکەێد.
دویای کەمیگ، دەس کردە گیرفانی، و یەک چوکلێتیگ ک وەزوور لەبن گیرفانەگەی دراورد، و کەمیگیش کلێنیکس پلگیاسە تووکڵ چوکلێتەگە، و ئەرا من پیشکەشی کرد، منیش فرە سوپاسی کردم.
من پاپەی ئی دووچەوەکیە نییم
راسە ک ئەو شیرینەگ ئەرا داڵگی پیشکەشی کرد فرە تامدارە، باوجی من دڵخوەرد لەوە نییم ک گشت مەیلیان هالای داڵگیان، ک ئیمەیش وەیجویرە بویمنە.
لەبان رەنج و مزڵکردن و مەینەتی و دڵسووزی باوگ، وەلێ دڵەگە هالای داڵگ، یەیشە چشتیگە لە سروشتی دروینمان و وەدەس خوەمان نییە.
ئەوەگ ئەڵاجەوییە، مناڵەیل دیر وەو دووسی فرەیانە ئەرا باوگیان زانن، یا دویای کووچکردن یا بیماری یا بیزاری لە ژیان.
یەیش وەخت دیریگە ئەرا باوگ.
ئیسە، هەرچەنی لە بڕیاریگ وڵ بووم، یا جەهان لەلیم تەنگاو بوی، یا لە کاریگ دوودڵ بویم، ئویشم: هایدە کوو باوگە؟.
