نێچیروان بارزانی چەوی کەفێدە قالیباف لە تەهران
شەفەق نيوز/ نێچیروان بارزانی سەرۆک هەرێم کوردستان، ئیوارەی یەکشەممە، چەوی کەفتە محمد باقر قالیباف سەرۆک ئەنجومەن شورای ئیرانی، لە تەهران پایتەخت.
وەرجەیە، مەسعود پزیشکیان سەرۆک ئیران چەوی کەفتە نێچیروان بارزانی، ئەوەیش لە پەراویز بەشداریکردنی لە خول چوارەم کۆڕبەند دیالۆگ تەهران.
دویای ئەوە، چەوی کەفتە عەباس عراقچی وەزیر دەیشت ئیران، و گفتوگۆ لەبان دویاترین گەشەیل ناوچەگە و سروشت پەیوەندییەیل دووانی ناوەین هەرێم کوردستان و تەهران کردن.
سەردان نێچیروان بارزانی ئەرا تەهران وە مکیسیگ فەرمی لەلایەن عەباس عراقچی وەزیر دەیشت ئیران تیەێد، ئەرا بەشداریکردن لەو کۆڕبەندە کە رووژەیل 18 و19ی ئايار وەڕیەو چوود، وە بەشداریکردن شاندەیل 53 دەوڵەت.
لە وتارەگەی لەناو کۆڕبەندەگە، بارزانی باس سەختیەیل لەڕوی پەیوەندییەیل ناوەین بەغداد و هەولێر کرد، و دووپات کرد کە حکومەت لە بەغداد وەگورەی دەستوور رەفتار وەرد هەرێم کوردستان نیەکەێد، کە چارەسەری زویوەزوی خوازێد ئەرا پرس فیدڕاڵی ناوەین دوو لایەن.
بارزانی دووپات لەو پەیوەندییەیل میژووی و کەلتوریە کرد کە گەلەیل کورد و ئیرانی وەیەکەو بەسن.
