نێچیروان بارزانی وەگەرد باڵیۆز بەریتانیا باس پرس دروسکردن حکومەت هەرێم کەێد
شەفەق نيوز/ نێچیروان بارزانی سەرۆک هەرێم کوردستان، ئمڕوو چوارشەممە، وەگەرد ئیرفان سەدیق باڵیۆز بەریتانیا لە عراق باس گفتوگوکردن ناوەین هەولێر و بەغدا کرد ئەرا چارەسەرکردن باوەتەیل گیرهاتگ، و رەوش ناو هەرێم کوردستان، و تەقەلایل دروسکردن کابینەی نوو حکومەت هەرێم کوردستان.
نویسنگەی سەرۆک هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس پەیوەندییەیل ناوەین بەریتانیا و عراق و هەرێم کوردستان کریا، و گفتوگوکردن ناوەین هەولێر و بەغدا، ئەرا چارەسەرکردن باوەتەیل گیرهاتگ، و رەوش ناو هەرێم کوردستان، و تەقەلایل دروسکردن کابینەی نوو حکومەت هەرێم کوردستان، هەمیش باس دویاترین گەشەیل لە ناوچەی خوەرھەڵات ناوڕاس و را و نووڕینەیل کریا.
وەگورەی بەیاننامەگە، هەردوگ لایەن دووپات لە گرنگی قایمکردن پەیوەندییەیل و فراوانکردن ئاسووەیل هاوکاری هاوبەش ناوەین بەریتانیا و عراق و هەرێم کوردستان کردن، و لەبان گرنگی چارەسەرکردن پرسەیل ناوەین هەولێر و بەغدا لەڕی لەیەکفامسنن و گفتوگوکردن، و لەبان گرنگی دروسکردن کابینەی نوو حکومەت هەرێم کوردستان.
لەباوەت نووەوبویەیل خوەرهەڵات ناوڕاس، هەردوگ لایەن دووارە دووپات کردن کە چارەسەرکردن ناکۆکیەیل لەڕی ئاشتەوایی، و پابەندی وە ریەیل دیبلۆماسی، کەفێدە بەرژەوەنی گشت لایەنەیل و پاڵپشتی لە ئاسایش و ئارامی لە ناوچەگە کەێد، هەمیش لە دیدارەگە باس پەیوەندییەیل ناوەین عراق و هەرێم کوردستان وەرد دەوڵەتەیل هاوسا و ناوچەگە کریا، وەگەرد بڕیگ باوەت گرنگ لەلای هەردوگ لایەنر لەو دیدارە کە قونسوڵ گشتی بەریتانیا لە هەرێم کوردستان ئامادەی بوی.
