لە دووپاتکردن ئەرا شەفەق نیوز.. ئۆپۆزسیۆن کوردی: گامیگ ئەمریکی- شیعە ئەرا چارەسەرکردن قەیران مووچە

وە پشتڕاسکردن ئەوەگ ئمڕوز شەممە ئاژانس شەفەق نیوز بڵاوی کرد، ئۆپۆزسیۆن لە هەرێم کوردستان راگەیان کە هیزە سیاسییە شیعەیل و ئەمریکا لەبان چگنەسە ناو کڕ قەیران مووچەی فەرمانبەرەیل هەرێم.

عەلی حەمە ساڵح، سەرۆک بزووتنەوەی "هەڵوێست" لە هەرێم کوردستان لە پۆستیگ راگەیان کە شانید شیعە وە سەرۆکایەتی هادی عامری سەردان هەولێر کەێد، لە خود وەختیش باس ئەوە کرد کە ئەمریکییەیل داوای چارەسەری کێشەگەیان کردگە لە ری دیالۆگەو.

وتیش: گفتوگۆ لە دوو باوەت گەن، یەکەمیان مووچەی فەرمانبەرانە ئەرا مانگ ئایار، دویەمیش نەفت و بەش هەرێم لە بودجە. 

شەوەکی ئمڕوو، ئاژانس شەفەق نیوز، وە پشتبەسین وە سەرچەوە تایبەتەیل، بڵاو کرد کە لایەنە سەرەکییە کوردستانییەیل هویر لە کیشانەوە لە پرۆسەی سیاسی یا وسانن بەشداریکردنیان لە دانیشتنەیل پەرلەمان کەن ئەگەر قەیران مووچەی فەرمانبەرەیل هەرێم کوردستان چارەسەر نەکرێد. دووپاتیش کرد کە "ئی پێشنیازە لە ئاست بەرزەیگ باس لەلی کریەێد لە وەڵام بڕیارەیل ئی دوایی بەغدا"، باس وسانن بودجەی وەزارەت دارایی فیدراڵی ئەرا مووچەی مانگ ئایار 2025 کریەێد.

سەرچەوەگە وتیش "هادی عامری سەرۆک هاوپەیمان فەتح سەردانیگ ئەرا هەرێم کوردستان کەێد، لەو سەردانە وەرد سەرکردەیل پارتە کوردەیل گردەو بوود، وە ئامانج کپەوکردن قەیرانەگە و وەمینەی چارەسەری زویوەزوی ئەرا گرژیی دارایی ناوەین حکومەت ناوەند و هەرێم".

سەرچەوە ئاگادارەیل ئەرا ئاژانس شەفەق نیوز وتن: محمد شیاع سودانی سەرۆک وەزیرەیل عراق ئامادەیی خوەی نشان دا ئەراک بەشەوکردن مووچەی فەرمانبەرەیل کوردستان ئەرا مانگی ئایار، وە دوو مەرج: کە وەشیوەی قەرز وەختانە بوود نەک جویر شایستە، و دەسەیگ باڵای هاوبەش وەرد هەولێر دروس بوود ئەرا پەیاکردن چارەسەر قەیرانە کەڵەکەبویی مووچە، وەرژە جەژن قوربان.