فه‌يلی: ناكووكی كورد ها وه‌ل لايه‌نه‌يل سياسی شيعه نه‌ك ناونی كورد و شيعه
فه‌يلی له ديمانه‌يگ وه‌ل كه‌ناڵ "كوردستان 24″ ك(شه‌فه‌ق نيوز)ئاگاداری بوی، وت: هه‌ڵه‌ی گه‌ورايگ له‌لايه‌ن هووكاره‌يل ره‌سانن كوردستانيه‌و ئه‌كريه‌ێد ك ئه‌ويش بڵاوكردنه‌وه‌ی مسته‌ڵح ناكووكيه‌يل ناونی كورد و شيعه‌سه‌و من باوه‌ڕم ئه‌وه‌سه ئی مسته‌ڵه‌حه نادروسه‌و بايه‌سه راسه‌و بكريه‌ێد، چوينكه كيشه‌گه له‌ناونی ئی دو پيكهاته نيه، به‌ڵكوو ها ناونی كورد و حزبه‌يل و لايه‌نه‌يل سياسی شيعه، ئمجا جوور ئه‌وه‌گ چوين ئسلام سياسی هه‌س، مه‌زه‌وه‌يل سياسييش وجوود ديرن.
فه‌يلی وت: هاوپه‌يمانی ناونی كورد و شيعه له‌بان بنه‌مای نه‌توه‌يی يا تايفی نيه، به‌ڵكوو هاوپه‌يمانييگ سياسيه‌و هه‌ميشه سياسه‌تيش قابل وه ئالشتكاری و به‌رزی و نزميه‌و حزب و لايه‌نه‌يل شيعه‌يش كيشه‌يل ناوخوه‌يی ديرن له‌ناونی خوه‌يان نه‌ك ته‌نيا وه‌ل كورد و ئاماژه وه‌يه‌يش كرد ك دامه‌زرانن ده‌وڵه‌ت عرای وه‌شيوه‌ی ته‌ماميگ دروس نه‌ويه‌و ئه‌و پيكهاته‌يله ك له‌تی وجوود ديرن ناچار كريانه وه‌ل يه‌كا بژيه‌ن.
فه‌يلی باس له‌وه‌يش كرد ك له‌سای ئی بار گرژه ك له‌تی ژيه‌يم بريگ سياسی هه‌ن ئيهانه و ده‌مدريژی له‌بان كورد ئه‌كه‌ن و مافه‌يليان ناديار ئه‌كه‌ن وه‌خاتر به‌رزه‌وكردن باڵانس خوه‌يان له جاده‌ی عه‌ره‌بی عراقی و هه‌ر وه‌و خاتريشه هه‌ڵمه‌تيگ خراو هه‌س دژ كورد له عراق.
له‌باوه‌ت ئی قه‌يران دوياخره‌يش ك روێدا له‌ناونی هيزه‌يل پێشمه‌رگه‌و حه‌شد شه‌عبی له قه‌زای خورماتوو، فه‌يلی وت: حه‌شد شه‌عبی ئه‌دێده دو به‌شه‌و، به‌ش يه‌كه‌م له‌ليان سه‌ر وه مه‌رجه‌عيه‌تن و ئه‌واكه‌يش سه‌ر وه ئيرانه‌و هه‌ردوگيانيش له‌وه‌ختيگ داعش ده‌سڵات گرته بان ناوچه‌يليگ له عراق و هه‌ڕه‌شه له شيعه و وجوديان كرد دامه‌زريان، ك ئی حه‌شده مقه‌يه‌تی له تايبه‌تمه‌ندی پيكهاته‌گه‌ی خوه‌ی و ئه‌و ناوچه‌يله ئه‌كا ك زوورم مه‌ردمه‌گه‌ی له پيكهاته‌گه‌ی خوه‌يه‌و له هه‌مان وه‌خت ئه‌ركيليگيش له ده‌يشت عراقيش ئه‌نجام ئه‌ياد له مقيه‌تيكردن تايفه‌و پيكهاته‌يل تر.
فه‌يلی جه‌خت له‌وه‌يش كرد ك عراق ره‌سيه‌سه ڕييگ بنبه‌س و ڕی گله‌وخواردن نه‌يرێد و بايه‌سه وه ئاشكرا و ڕاسی قسه وه‌ل خوه‌مانا بكه‌يم و يه‌يش ده‌رخست ك بايه‌سه له‌بان كورد وه‌رده‌وام بوون له‌بان ريڕه‌و راس و دوير بگرن له هه‌ر چشتيگ چويچنێده‌يان، چوينكه نه‌ته‌وه‌گه‌مان پڕه له ئايين و مه‌زه‌وه‌يل جياجيای جوور سنی و شيعه‌و ئێزێدی و شه‌به‌ك و كلكه‌يی و بايه‌سه له‌بانمان ريز و حورمه‌ت له يه‌كتری بگرێم.
