پەرلەمان عراق لە یەکەم دانیشتنی ئەرا هەڵوژاردن سەرۆک کۆمار شکست تیارێد
شەفەق نیوز/ ئەنجومەن نوینەرەیل عراق، ئمڕوو پەنجشەممە، لە هەڵوژاردن سەرۆک کۆمار شکست هاورد، تا بچوودە دانیشتنیگتر، ک دووان لە سەرکەفتگەیل لەناوی رکابەری کەن.
پەیامنێر ئاژانس شەفەق نيوز وت: نیمەڕو ئمڕوو ئەنجومەنەگە دەسکردە دەنگدان لەبان کاندیدەیل ئەرا پۆست سەرۆک کۆمار ک شمارەیان ٤١ کاندیدە، باوجی لە ساعەتەیل دویایین دوو کاندید رێبەر ئەحمەد و عومەر بەرزنجی خوەیان کیشانەو، و رکابەریەگە کەفتە ناوبەین ٣٩ کاندید.
لە یەکەم دانیشتن کاندەید عەبدولەتیف رەشێد ٥٨ دەنگ هاورد، وەجیاوازی ٥٩ دەنگ لەبان دویەم سەرکەفتگ ک بەرهەم ساڵح سەرۆک کۆمار ئیسە بوی، ک ئەوەیش ٩٨ دەنگ وەدەس هاورد، تا کارەگە بکەفێدە دانیشتنیگتر.
مادەی ٧٠ لە دەستوور عراق ئویشێد:
یەکەم: ئەنجومەن نوینەرەیل لەناو کاندیدەیل وە زۆرینەی دوو لە سێ بەش ئەندامەیلی هەڵوەژێد.
دویەم: ئەگەر هویچ لە کاندیدەیل زۆرینەی داواکریاگ وەدەس نەهاوردن، رکابەری کەفێدە ناوبەین کاندیدەیل خاوەن بەرزترین دەنگ، و هەرکامیان فرەی دەنگەیل لە دویەم هەڵوژاردن کەفێدە دەسی وە سەرۆک کۆمار راگینیەێد.
