دوو ئاگر ئەمماریگ و چاپخانەیگ لە بەغداد سزنن
شەفەق نیوز- بەغداد
ئاگریگ لەناو ئەمماریگ بازرگانی ئەرا هەڵگردن و بازرگانی ئامێر و کەرەستە کارەباییەیل لە ناوچەی باب شەرقی لە ناوەڕاس بەغداد، ئمڕوو یەکشەممە، هیز گرد، لە وەختیگ تیمەیل وەرگری شارستانی تۊنستن کپیەو بکەن بی توومارکردن زەرەدەیل گیانی.
وەڕێوەبەرایەتی وەرگری شارستانی، لە بەیاننامەیگ کە رەسیە ئاژانس شەفەق نیوز، دیاری کرد کە 12 تیم ئاگرکپەوکردن بەشداری لە پرۆسەیل کۆنترۆڵکردن ئاگرەگە کردن کە لەناو ئەمماریگ رۊ داگە رووبەرەی رەسێدە نزیکەی 200 مەتر چوارگووشە، کە لە پلێتەیل "چینکۆ" دروس کریاگە و پیچەوانەی رێنمایی و رێکارە فەرمییەیل تایبەت وە مەرجەیل بیوەیی.
وەڕێوەبەرایەتییەگە ئاشکرا کرد کە ئەممارەگە دۊایین وەشکین بیوەیی لە ئایار/ مایۆ 2026 ئەرای کریاگە، کە لەو وەختە دەسە پسپۆڕەگە تەمەی کردگە وە لاوردنی و لەنوو دروسکردنی وەپای رێنمایی و مەرجەیل بیوەیی گشتی.
هەمیش وت کە وەڵامنەیان وەکارهاورەیل جەمەلۆنەگە ئەرا تەمەی و هوشدارییە وەرینەیل هاوبەش بۊە لە رۊداین ئاگرکەفتنەگە، و دەسنشان ئەرا ئەوە کرد کە زەرەدەیل تەنیا لەبان لایەن دارایی کوڵەو بۊە، لە وەختیگ هیچ زەرەدیگ گیانی توومار نەکریا، وە مدوو پەلەکردن تیمەیل وەرگری شارستانی و دەسوەردانیان و کۆنترۆڵکردن رۊداوەگە.
لە رۊداویگ ترەک، وەڕێوەبەرایەتی وەرگری شارستانی راگەیان، کە تیمەیلی تویش سەختی بۊنە لە رەسین ئەرا ئاگرکەفتنیگ کە لەناو چاپخانەیگ بازرگانی لە ناوچەی شەقام سەعدون لە ناوەڕاس بەغدای پایتەخت، وە مدوو هەرەمەکی پارککردن ماشینەیل لەبان هەردوگ لای ریەیل و چوارڕیانەیل.
و دەسنشان ئەرا ئەوە کرد کە ئەو ماشینەیلە کە وە شیوەیگ هەرەمەکی پارک کریانە بۊنەسە مدوو پەکخستن جۊلەی ماشینەیل ئاگرکپەوکردن و دۊاخستن رەسینیان ئەرا شوین ئاگرەگە، ئەوەگ بۊیە مدوو لەدەسداین وەختیگ گران کە شایەت هاوبەش بۊاتاد لە پەلەکردن لە کۆنترۆڵکردن رۊداوەگە و کەمەوکردن زەڕەدەیلی.
هەمیش دووپات کرد کە زویوەزوی رەسین تیمەیل وەرگری شارستانی نوێنەرایەتی مدوویگ یەکلاییکەر کەێد لە رەفتارکردن وەگەرد ئاگرەیل و رزگارکردن گیان و ماڵ و سامانەیل، و هوشداری دا لەوەگ زیایچگن لەبان ریەیل و ریگریکردن لە ریەیل فریاگوزاری پەلە شایەت بۊنە مدوو دەرەنجامەیل رخداریگ لە رۊداوەیل و ئاگر.
