دۆلار دەر 200 هەزار تمەن لە ئیران کوتێد لە نزمترین ئاست میژوویی
شەفەق نیوز- تاران
دۆلار ئەمریکی، ئمڕوو یەکشەممە، لە وەربەس 200 هەزار تمەن لە بازاڕ ئازاد ئیرانی نزیکەو بۊ، وە توومارکردن ئاستیگ میژوویی نوو، لەناو زویبوین داواکاری لەبان دراوە بیگانەیل و بەرزەوبۊن رخەیل لە پاکەیج سزایەیل ئەمریکی نوو، لە وەختیگ ئابووری ئیرانی لە دەرەنجامەیل جەنگ و هەڵاوسان و کەمەوبۊن داهاتەیل وە دراو قورس ناڵێد.
داتایەیل توڕ زانیارییەیل زەڕ و دراوەیل ئیرانی "TGJU" ئاڵوگۆڕکردن دۆلار لە نزیک 198 هەزار تمەن نیشان دان، لە وەختیگ نرخەیل ترەک لە بازاڕ ئازاد نرخەیل فرووشتنیگ نیشان دان کە نزیکەو بۊن لە 200 هەزار تمەن، وەگەرد جیاوازی نرخەیل ناوەین سەکوویەیل ئاڵوگۆڕکردن و سەرافەیل وە مدوو سروشت نافەرمی و بڵاو بازاڕەگە.
سەرچەوەیل وەدۊاکەفەر ئەرا بازاڕەگە نرخ فرووشتن وە نزیکەی 197 هەزار و 950 تمەن ئەرا دۆلاریگ توومار کردن، لە وەرانوەر نزیکەی 195 هەزار و 950 تمەن ئەرا سەنین، دۊای ئەوەگ هەفتەی گوزەشتە لە نزیکەی 186 هەزار و 500 تمەن دەسوەپی کردۊد، ئەوەگ واتە بەرزەوبۊنی وە زیاتر لە 6% لە ماوەی کەمتر لە هەفتەیگ.
ئی بەرزەوبۊن دۊاییە دراو ئیرانی خەێدە نوای وەربەس دەروینی کە رەسێدە 200 هەزار تمەن ئەرا دۆلاریگ ئەرا یەکەمین جار، دۊای ئەوەگ دۆلار لە دەورگرد 100 هەزار تمەن خولیاد وەرجە نزیکەی 15 مانگ تەنیا، لە وەختیگ هەوەجە وە نزیکەی 15 ساڵ داشت ئەرا گواستنەوە لە ئاست هەزار تمەن وەرەو 100 هەزار تمەن.
بازاڕکەرەیل و شیەوکەرەیل ئی بەرزەوبۊن زویەگە ئەرا بڕیگ هوکار گلەو دەن کە لە بتنیانەو هەڵاوسان بەرزە، و زیایبۊن داواکاری لەبان دراوە بیگانەیلە چۊ پەناگەیگ ئەرا مقیەتی لە نرخ، و کەمەوبۊن هاتن دراو بیگانە، بیجگە رخەیل لە تونەوکردن سزایەیل ئەمریکی و وەردەوامبۊن نادیاری لەباوەت ئاییندەی وەرەوڕۊبۊن ناوەین تاران و واشنتن.
و ئی بازداینە نووە وەرجە راگەیانن سەرۆک ئەمریکی دۆناڵد ترەمپ لەباوەت پاکەیجیگ نوو لە سزایەیل لەبان ئیران هات.
ئیران وە کردار تویش فشاریەیل ئابووری سەختیگ بوود دۊای نزیکەی شەش مانگ لەو جەنگە کە وە گورزەیل ئەمریکی و ئیسرائیلی لە 28 شوبات گوزەشتە دەسوەپی کرد، لە وەختیگ هێمان دانوسەنینە سیاسییەیل وسیانە هەرچەن جەنگە سەربازییە راسەوخۆیەیل ناوەین هەردوگ لەی دۊاییە وسیاس.
هەمیش جۊلەی نەفت لەڕی تەنگەی هورمز وە رادەیگ گەورە پەک کەفت، هاوەخت وەگەرد گەمارۆیگ ئەمریکی ئەرا بەندەرە ئیرانییەیل، ئەوەگ فشارەیل لەبان بازرگانی و هاتن دراو بیگانە دووقات کرد.
