پەیاکردن تەرم ٨٠٠ ساڵەیگ لە پیرۆ
شەفەق نیوز/ تیمیگ لە پسپۆڕەیل، تەرمیگ مومیا لە کناراو پیڕۆ پەیا کردن، مەزەنە کریەێد تەمەنی ئەرا ٨٠٠ ساڵ گوزەیشتە چوودەو.
ئەو مومیا کە پەیا کریا، کەسیگ بۊیە لەو شارستانیە ک لەناوبەین کناراو و کۊیەیل پیڕۆ بۊیە. پیتەر ڤان دالین پسپۆڕ ئاسەواری وت: مومیاگە لەناوچەی لیما پەیا کریا، و رەگەزی دیاری نەکریاگە.
زاناگە لە زانکۆی ویلایەت سان مارکۆس دیاری کرد ک تەرمەگە هن کەسیگە لە ناوچەی کۊیەیل ئەندیز بۊیە.
وتیش: تەرمەگە لەناو قەورسانیگ ژیر زەۊی لە دەورگرد شار لیما پەیا کریا، وتیش: قەورسانەگە هەمیش چەن چشتیگ دیاری لەناوی بۊی.
پیڕۆ سەدان شۊین ئاسەواری لە شارستانی وەرجە و دۊیای ئیمبراتۆریەت ئینکا لەناوی هەس، ئەو ئیمبراتۆریەتە ک وەرجە ٥٠٠ ساڵ لەبان بەش باشوور ئەمریکای باشوور لە باشوور ئیکوادۆر و کۆڵۆمبیا تا ناوڕاس چیلی زاڵ بۊیە.
